Исроил мудофаа вазири Исроил Кац Эроннинг диний раҳбари оятуллоҳ Али Хоманаий агар Исроил билан қарама-қаршилик сиёсатини давом эттирмоқчи бўлса, Саддам Ҳусайннинг тақдирини эслаб қўйиши кераклигини билдирди. Бу ҳақда Исроил Мудофаа вазирлиги баёнотида маълум қилинган.
Кацнинг сўзларига кўра, Исроил Эрон ҳудудига зарбалар беришни давом эттиради.
“Мен Эрон диктаторини ҳарбий жиноятлар содир этиш ва Исроил фуқароларига ракеталар учиришни давом эттиришдан огоҳлантираман. У Исроил давлатига қарши худди шундай йўл танлаган қўшни мамлакат диктаторининг тақдирини ёдда тутиши лозим”, деди Кац.
Мудофаа вазири Исроил аввалроқ Эрондаги ИРИБ давлат телерадиокомпаниясининг Теҳрондаги биносига зарба берганини таъкидлаб, зарба нишони Эрон ҳукуматининг бошқа тузилмалари ҳам бўлиши мумкинлигини қўшимча қилган.
Исроил армияси бугун “кеча тарғибот ва таҳрикловчи телерадио хизматига қарши” ҳаракат қилганидек, “Теҳрондаги режим ва ҳарбий мақсадларга қарши ҳаракат қилишни давом эттиради, дея изоҳ берган Исроил мудофаа вазири.
Бундан аввал Исроил бош вазири Биньямин Нетаньяху АБC телеканалига берган интервьюсида Хоманаийнинг йўқ қилиниши ҳозирги можарога чек қўйиши мумкинлигини истисно қилмаган эди. Шу билан бирга, Reuters хабарига кўра, илгари Исроил гўёки Эрон раҳбарини йўқ қилиш имкониятини кўриб чиққан, бироқ Вашингтон, хусусан, Дональд Трамп бунга қарши чиққан.
Эрон ва Исроил ўртасидаги можаро 13 июнь куни Исроил армияси Эрондаги ядро объектлари ва қўмондонлик пунктларига кенг кўламли ҳаво ҳужумларини бошлаганида кескин тус олди. Асосий ҳарбий раҳбарлар, жумладан, Бош штаб бошлиғи ва Инқилоб қўриқчилари корпуси қўмондони, шунингдек, ядро олимлари ҳалок бўлди. Эронда қурбонлар сони 220 кишидан ошди.
Эрон баллистик ракеталар билан жавоб қайтарди, натижада Исроил ҳудудида 24 киши ҳалок бўлди ва 500 дан ортиқ киши яраланди. Туркия ҳам қўшилган ҳолда халқаро ҳамжамият вазиятнинг кескинлашувидан ташвишга тушди ва Исроилнинг ҳаракатларини қоралади.
Изоҳ (0)