Афғонистоннинг Балх вилоятида бу йил қишлоқ хўжалиги, айниқса, тарвуз ва қовун етиштириш ўтган йилларга нисбатан бир неча баробар ошди. Бироқ Мозори Шариф фуқаролари иқтисод заифлиги сабабли мева ва бошқа қишлоқ хўжалиги маҳсулотларини сотиб олишга қурби етмайди. “Дарё” мухбири билан суҳбатда мозори-шарифликлар мавжуд муаммолар ҳақида гапириб берди.
Маълум бўлишича, Балх вилоятидаги ўн тўртта туманнинг барчаси деҳқончилик билан шуғулланади.
“Толибон” етакчилари халқнинг иқтисодий муаммоларини ўйлаб, уларни ҳал қилиш учун жиддий чоралар кўриши керак. Акс ҳолда тез орада фалокат юз беради ва одамлар очликдан ўлаётганини кўрамиз, дейди маҳаллий аҳоли.
Балхлик деҳқонлардан бири 20 йил ичида қовун ва тарвузнинг бунчалик арзон бўлмаганини, ўтган йилларда 150 афғонига (тахминан 27 минг сўм) сотилган қовун ҳозирда 50 афғонига (тахм. 9 минг сўм) сотилаётганини таъкидлаган.
Шахсан мен бу ҳолатдан мамнун эмасман, чунки икки юз минг афғони пул қарз олиб, деҳқончилик билан шуғулланганман, энди эллик минг афғонига қовун-тарвузимни сотиб, бу йил деҳқончиликдан кўп зарар кўрдим, келажакда қовун-тарвуз етиштирмайман, дейди у.
Афғонистонда қовун килограмм билан эмас фақат дона билан сотилади, энг арзон қовун 10 афғони (тахм. 2 минг сўм) ва энг қиммат қовун нархи эса 50 афғони туради.
Мозори Шарифдаги баъзи қовун сотувчилар ҳам бу йил қовун ҳосили жуда яхши, лекин қовун савдоси фойда олиб келмаётганини таъкидлаган.
Ўзини Нақибулла деб таништирган савдогарлардан бири ҳам қовун сотиш билан шуғулланади. Унинг “Дарё” мухбирига маълум қилишича, халқ сотиб олишга қурби етмагани учун бирорта ҳам қовун сота олмаган. У қовун ва тарвуз бундан арзонлашиб кетишидан хавотир билдирган.
Яна бир маҳаллий савдогарнинг сўзларига кўра, Мозори Шариф деҳқонлари бу йил ўз харажатларини қоплай олмаган ва зарар кўрган. Унинг қўшимча қилишича, таклиф 90 фоиз, талаб эса 10 фоизни ташкил этади. Қовун арзонлиги сабаби эса Покистондан бошқа чет давлатга экспорт қилинмаслиги билан изоҳланган.
Изоҳ (0)