Афғонистонда “Толибон” ҳаракати хорижий дипломатлар учун ифторлик ташкил қилди. Тадбир давомида Ғазодаги вазият, Афғонистондаги иқтисодий лойиҳаларга сармоя киритиш муҳокама қилинди. Бу ҳақда Sputnik Афғонистон хабар берди.
Ифторликни “Толибон”нинг маъмурий масалалар бўйича бош вазир ўринбосари Абдул Салам Ҳанафий ташкил қилган. Унда Ўзбекистоннинг Кобулдаги элчиси Ёдгорхўжа Шодмонов ҳам иштирок этган. Абдул Салам Ҳанафий ўз нутқида Исроилнинг фаластинликларга нисбатан геноцидини қоралаган, “Толибон”нинг турли соҳаларидаги ютуқларини эслаган, Кобулнинг барча давлатлар билан иқтисодий йўналтирилган ташқи сиёсат асосида уларнинг ички ишларига аралашмасдан муносабатларни ривожлантириш истагини билдирган.
Шунингдек, “Толибон” расмийси хорижий дипломатларни иқтисодий лойиҳаларга сармоя киритишга чақирган:
- “Ҳайратон — Харлачи” темирйўли;
- “Спин-Булдак — Ҳирот” темирйўли;
- “Чабаҳор — Миляк” темирйўли ;
- Лазурит коридори;
- Вахан коридори;
- ТAPI газ қувури.
Маълумот ўрнида, Ўзбекистон темир йўллари бошқармаси делегацияси 2 апрель куни Кобулга ташриф буюриб, Афғонистон темир йўллари департаменти раҳбарияти билан учрашди. Учрашувда Ўзбекистон Афғонистон учун темирйўл тарифини 50 фоизга пасайтирмоқчилиги маълум бўлди.
Бундан ташқари, мева-сабзавотларни ортиш ва тушириш мақсадида Ҳайратон—Мозори Шариф йўналишидаги Наибобод бекатида омборхона қурилади. У Афғонистондан мева-сабзавотларни Марказий Осиё, Европа ва хорижий мамлакатларга кечиктирмасдан ва зарар етказмасдан етказиб берилишини таъминлайди.
Изоҳ (0)