Россияда хорижий платформаларга қарамликни камайтириш ва рақамли суверенитетни мустаҳкамлаш учун миллий хабар алмашиш иловаси яратилади. Бу ҳақда Anadolu хабар берди.
“Илова Telegram ва WhatsApp каби хавфсиз бўлмаган хорижий мессенжерлардан замонавий ва функсионалроқ. У хорижий платформаларни тақиқлашга эмас, балки хабар алмашиш соҳасида ҳақиқий рақобатни яратишга асосланган. WhatsApp ва Telegram ишлашда давом этиши мумкин — агар улар қонунларимизга тўлиқ мос келса! Аммо энди улар рақобат йўқлигидан фойда кўрмайдилар” деди Россия Давлат думасининг ахборот сиёсати бўйича қўмитаси раҳбари Сергей Боярский.
У Россиянинг кенгроқ рақамли трансформациясига ишора қилиб, маҳаллий иловалар, электрон ҳукумат хизматлари, онлайн банкинг ва маҳаллий ижтимоий тармоқлардан кенг фойдаланаётганини ҳам таъкидлаган. Лойиҳа давр талабларига мослашиш бўлиб, Россиянинг рақамли инфратузилмасини ривожлантириши кутилмоқда.
Россияда Украина уруши бошланганидан кейин бир нечта хорижий ижтимоий тармоқлар блокланган. Энг машҳурлари — Facebook, Instagram, Twitter ва TikTok. Меtа компаниясига тегишли Facebook ва Instagram 2022 йил март ойида “экстремистик” деб эълон қилиниб, тақиқланган. Twitter ва TikTok ҳам Россияда чекловларга дуч келган. YouTube дастлаб блокланмаган, аммо кейинчалик айрим контент ва каналлар чекланган. Бу чоралар Россия ҳукуматининг ахборот назоратини кучайтириш мақсадида қабул қилинган.
Изоҳ (0)