Telegram асосчиси Павел Дуров фарзандларининг онаси Ирина Болгар Telegram асосчисига қўйиладиган янги талабларни маълум қилди.
У мессенжерни Дуров билан биргаликда эришилган мулк деб ҳисоблаган ҳамда унга бўлган ҳуқуқларнинг ярмини суд орқали олиш ниятини маълум қилган. Болгарнинг сўзларига кўра, уларнинг Дуров билан рўйхатдан ўтмаган муносабатлари 10 йил давом этган, бу даврда учта бола туғилган.
Аёлнинг қўшимча қилишича, у тадбиркорнинг мол-мулкидан фойдаланиш ҳуқуқига эга бўлган, аммо фойдаланиш шартномалари, аёлнинг фикрича, “унинг ҳуқуқларини тўлиқ ҳимоя қилмаган”.
“Никоҳимиз расмий рўйхатга олинмагани ва биргаликда эришилган мулк, жумладан, асосий актив – Telegram мессенжери фақат унинг номига рўйхатга олинган бўлишига қарамай, фарзандларим ҳамда мен ҳар доим оилавий ресурслардан фойдаланиш имкониятига эга бўлишимизга чин дилдан ишонардим”, дейди Болгар.
Унинг қўшимча қилишича, Дуров болаларнинг молиявий хавфсизлигини кафолатлашга, улар учун маблағ ажратишга ҳамда уларга қиммат уй сотиб олишга ваъда берган.
“Аксар мамлакатларда де-факто никоҳ расмий деб тан олинади, бошқаларида сиз фуқаролик қонунчилигига мувофиқ биргаликда сотиб олинган мулкнинг улушини талаб қилишингиз мумкин”, дея таъкидлаган Болгар.
Изоҳ (0)