Facebook’дан унга тегишли WhatsApp ва Instagram’ни алоҳида компания қилиб ажратиб ташлаш, ижтимоий тармоқ олдида турган муаммоларни ечишга ёрдам бермайди. Бу ҳақда Facebook асосчиси Марк Цукерберг France Info каналига берган интервьюсида маълум қилди, деб хабар беради Meduza.
«Крис Хюзнинг ёзганларини ўқиб, унинг таклифи муаммога ечим бўла олмайди деб ўйлайман. Фикримча, демократия ва сайловлар ҳақида ўйлайдиган инсонлар сайловларга аралашишга қарши курашадиган замонавий ечимларни яратиш учун йилига миллиардлаб доллар тикадиган компанияга эга бўлишдан мамнун», — дейди Цукерберг.
Шунингдек, унинг таъкидлашича, 2019 йили Facebook’нинг хавфсизлик бюджети 2012 йилда биржага чиққанида олган барча даромадларидан ортиқроқни ташкил этган. «Биз муваффақиятли бизнес қурганимиз сабаб, буни ўзимизга эп кўра оламиз», — дея таъкидлайди Цукерберг.
Facebook’нинг халқаро ишлар ва жамоатчилик билан алоқалар бўйича вице-президенти Ник Клегг The New York Times газетасига колонка ёзиб, Facebook’ни парчалаш мақсадга мувофиқ эмаслигини билдирган. «Муваффақият учун жазоламаслик керак… Facebook’ни бўлиш эмас, унинг устидан назоратни ўрнатиш керак», — дейди Клегг.
Аввалроқ, Facebook ҳамасосчиси Крис Хьюз WhatsApp ва Instagram’ни ижтимоий тармоқда алоҳида компания қилиб ажратиб юборишни таклиф қилганди.
Изоҳ (0)