Ўзбекистон президенти Шавкат Мирзиёев туркман халқ миллий етакчиси, Халқ маслаҳати раиси Гурбангули Бердимуҳамедовни туғилган куни билан табриклади. Бу ҳақда президент матбуот хизмати хабар берди.
Президент ўз табригида Бердимуҳамедовга мустаҳкам соғлик, оилавий бахт-саодат, қардош Туркманистонга тинчлик-осойишталик ва равнақ тилаган. Унинг замонавий Туркманистонни барпо этиш ва изчил ривожлантириш, мамлакатнинг халқаро нуфузини ошириш, Ўзбекистон билан Туркманистон ўртасидаги дўстлик, яхши қўшничилик ва стратегик шериклик муносабатларини мустаҳкамлашга қўшган шахсий ҳиссаси эътироф этилган.
Туркман халқи миллий етакчиси Ўзбекистон президентига Туркманистон раҳбари Сердар Бердимуҳамедовнинг саломини етказган. Етакчиларнинг мунтазам учрашувлари туфайли икки томонлама ҳамкорликда юксак даражага эришилгани қайд этилган.
Икки давлат ўртасида товар айирбошлаш ва юк ташиш ҳажми ортмоқда. Муҳим кооперация лойиҳалари амалга оширилмоқда, жумладан, “Шовот—Тошовуз” чегараолди савдо зонаси қурилиши якунланмоқда.
Фаол маданий-гуманитар алмашинувлар амалга оширилмоқда. Қўшма Ҳукуматлараро комиссия ва Ишбилармонлар кенгашининг навбатдаги йиғилишлари, Ҳудудлараро форумни ўтказиш режалаштирилган.
Телефон орқали мулоқотда минтақавий ҳамкорликнинг долзарб жиҳатлари, шу жумладан сентябрь ойида Тошкентда ўтказиладиган Марказий Осиё давлатлари раҳбарларининг еттинчи Маслаҳат учрашувига тайёргарлик кўриш масалалари ҳам кўриб чиқилган.
Изоҳ (0)