Вазирлар Маҳкамаси қарори билан Ўзбекистонда жинсини ўзгартирганлар энди исм-фамилиясини ҳам ўзгартирса бўлади.
Вазирлар Маҳкамасининг “Никоҳ, оила ва фуқаролик ҳолати далолатномаларини рўйхатга олиш соҳасидаги норматив-ҳуқуқий ҳужжатларни тизимлаштириш тўғрисида”ги қарорига киритилган ўзгаришларга кўра, 18 ёшга тўлган ва вояга етмаган фарзандлари бўлмаган шахслар фамилияси, исми ва отасининг исмини ўзгартириш бўйича аризаларни Ягона интерактив давлат хизматлари портали орқали ҳам бериши мумкин бўлади.
Шунингдек, фамилияси, исми ва отасининг исмини ўзгартириш бўйича аризалар “Давлат тили тўғрисида”ги қонунга мувофиқ:
- суднинг қонуний кучга кирган ҳал қилув қарори асосида;
- агар фамилияси ва исми эшитилишда ёқимсиз бўлса;
- агар шахснинг фамилияси ва исми миллатига тўғри келмаса;
- хоҳишига қараб ўзининг никоҳгача бўлган фамилиясига қайтишда;
- оила учун умумий фамилияда бўлиш истаги пайдо бўлганда;
- жинси ўзгарганда (бунда соғлиқни сақлаш муассасасидан жинсни ўзгартиргани тўғрисида тиббий хулоса тақдим этилиши керак);
- 16 ёшга тўлган шахсга нисбатан оталикни белгилашда кўриб чиқилади.
Бунга қадар (139-бандга кўра) жинсини ўзгартирган тақдирда туғилганлик, вафот этганлик, никоҳ ва бошқа гувоҳномаларга ўзгартириш киритиш мумкин эди, бироқ исм-шарифни фақат тарихий ва миллий анъаналар асосида, Ўзбекистон Республикаси “Давлат тили тўғрисида”ги қонуннинг 15-моддасига биноан ўзгартиришга рухсат берилган эди.
Изоҳ (0)