Наталя Крачковская — совет фильмларини томоша қилган ҳар бир киши танийдиган актрисалардан бири. Беғубор табассум ва яхши кайфият ҳар доим одамларни ўзига жалб қилган, аммо улар орасида ҳасадгўйлар ҳам кўп эди. Наталя тегишли маълумоти бўлмай туриб, катта кинога кириб борганида, улар унга ҳар хил йўллар билан халақит беришарди. Бундай пайтларда уни эри Владимир Крачковский ҳамиша қўллаб-қувватларди.
Фожиа кетидан фожиа
Наталя 1938 йилда актриса Мария Фонина ва майор Леонид Белогорсев оиласида туғилган. Уруш бошланиши билан отаси оиласини ташлаб, фронтга кетишга мажбур бўлади. Яқинларидан айрилганига қарамай, Леонид Белогорсев ҳам отасининг изидан боришни хоҳлади, у бутун умр ҳарбий иш билан шуғулланган ва император Николай II нинг шахсий қўриқчилигида хизмат қилган. Майор Германияга етиб боришга муваффақ бўлди, аммо қайтиб келмади: 45 йилда Мария Фонина унинг вафоти ҳақида хабар олди.
Театр актрисаси икки қизининг тарбияси ва таъминотини ўз қўлига олишига тўғри келди. Ўшанда Наталя етти ёшда эди, у ҳамма вақт ҳовлида ўғил болалар билан ўйнар ва серҳаракатлиги билан ажралиб турарди. Кичик синглиси Ирина эса ёши туфайли доимий назоратга муҳтож эди ва шунда қизларнинг бувиси ёрдамга келди. У Наталяни кўриб, қандай қилиб бўлса ҳам қизалоқни семиртиришни ўз олдига мақсад қилиб қўйди: қизгина туғилганидан заиф ва озғин эди, уруш йилларида эса аҳвол янада ёмонлашди.
Невараси ўн ёшга тўлганида семириб, юзлари қип-қизил бўлиб, бувисини хурсанд қиларди. Синфдошлар ҳам ҳар доим уларнинг кайфиятини кўтариб, бирор мавзуни батафсил тушунтириб бера оладиган меҳрибон қизни яхши кўришарди. Белогорсева яхши ўқирди, айниқса, тарихни яхши кўрарди. Қариндошлари Наташанинг мактабни битиргач, тарих-архив институтига ҳужжат топширмоқчи эканини эшитиб, умуман ҳайрон бўлишмади. Онаси бундай танловдан ҳаммадан кўра кўпроқ хурсанд бўлди: Мария Фонина қизи актриса бўлишини истамасди ва қизчаси у билан кўп вақтини саҳна ортида ўтказиб, ҳаётини ижод билан боғлашни хоҳлаб қолишидан хавотирда эди.
Унинг қўрққани барибир содир бўлди. Наталя онасидан яширинча иккита институтга ҳужжат топширди ва иккинчиси айнан кинематография институти эди. Наталянинг танлови осон кечди: Владимир Белокуров абитуриент қизнинг соддалиги ва ўзига ишончига шунчалик қойил қолдики, уни дарҳол ўз курсига қабул қилди.
Ўшанда бўлажак актриса онаси билан қаттиқ жанжаллашди, онаси қизининг қарорига қарши чиқди ва бундай қомат билан ҳеч қачон машҳурликка эришолмаслигини айтди. Аммо Наталя тўлача қомати айнан унинг ўзига хос жиҳати эканлигига ва бу у учун ҳеч қандай ноқулайлик туғдирмаслигига ишончи комил эди.
Наталяга институтни тугатиш насиб қилмади. Ўқишни бошлаганидан бир неча ой ўтгач, у жиддий бахтсиз ҳодисага учради ва кўриш қобилиятидан маҳрум бўлишига бир бахя қолди. Шифокорлар Наталяга ўқишни давом эттиришни қатъиян тақиқлади, шунинг учун у тез орада ўқишдан ҳайдалди. Бувиси яна неварасини парвариш қилишни бошлади: атиги бир-икки йил ичида у қизни оёққа турғазди ва ҳали ҳам саҳнани орзу қилаётган қиз кастингларга қатнай бошлади. У санъаткор бўлиш фикридан воз кечмади, махсус маълумоти бўлмаса-да, ҳаётини суратга олиш майдончаси билан боғлашга қарор қилди.
Чинакам бахтнинг чорак асри
Эҳтимол, Наталяни суратга олиш майдони шунчалик тортганининг сабаби, айнан ўша ерда уни муҳаббат кутаётганини олдиндан сезгани бўлса керак. Белогорсева оммавий саҳналарда чиқишни бошлади, кейинчалик эса кичик эпизодик ролларни олди. Актриса бундай ютуқлардан ҳам хурсанд эди: ҳатто ўн йиллар ўтгач ҳам, Наталя аҳамиятсиз персонажлар бўлмаслигини таъкидларди. Лойиҳалардан бирида унинг ҳаёти бутунлай ўзгариб кетди: “Тошқин” фильмини суратга олиш пайтида у овоз режиссёри Владимир Крачковский билан танишди.
Бир қарашда, кўзойнак таққан кўримсизгина эркак — бунинг устига бўлажак актрисадан ўн беш ёш катта — ҳеч қандай имкониятга эга эмасди. Наталя ҳар доим қарама-қарши жинс вакиллари орасида машҳур бўлган: ўзини кўрсатиш қобилияти, ўзига ишончи ва самимийлиги унга бошқалардан ажралиб туришга имкон берган. Бироқ Крачковский рақобатдан қўрқмади ва гўзал қизнинг муҳаббатини қозониш учун курашишга қарор қилди.
У Наталянинг нозик томони — овқатдан фойдаланди. Бир куни Владимир актрисани янги пиширилган кулчалар билан мазали нонушта тайёрлаб уйғотди ва унинг реакциясини кўриб, ҳар тонг шундай қила бошлади. Табиий равишда, қиз ўзига кўрсатилган бундай ғамхўрликни эътиборсиз қолдира олмади ва режиссёрнинг илтифотларига жавоб қайтарди. Наталяни 15 ёш фарқ мутлақо ўйлантирмасди: Владимирнинг тортинчоқлиги уни қизиқтирар, бундан ташқари, у кино арбоби ёнида ўзини ҳар қачонгидан-да бахтлироқ ҳис этарди.
Аммо санъаткорнинг онаси уларнинг турмуш қуришига кескин қарши чиқди. У қизининг ўзидан анча катта эркак билан бахтли бўлишига ишонмасди. Владимирнинг қариндошлари ҳам худди шундай фикрда эди, улар “ёш болани” нима учун уйга олиб келганига тушунмасди. Севишганлар бошқаларга қулоқ солмасликка қарор қилишди ва шунга қарамай, муносабатларни “Тошқин” фильмини суратга олиш тугашидан олдин расмийлаштирдилар.
1963 йилда Наталя ва Владимир оиласида Василий исмли ўғил туғилди. У отасининг изидан бориб, овоз режиссёри бўлишга қарор қилди. Унинг кўз ўнгида доимо ёрқин муҳаббат намунаси намоён бўларди: Крачковский турмуши давомида рафиқасига ҳар куни нонуштага янги кулчалар олиб келарди, унга ғамхўрлик қилар ва жанжаллашишга бўлган уринишларга ажойиб сабр-тоқат билан муносабатда бўларди. Бундан ташқари, Владимир севгилисининг карьерасига ҳам кўмаклашди: унинг ёрдами туфайли Наталя Леонид Гайдайнинг фильмида Грицацуева хоним ролини олди. Бу актриса ва режиссёр ўртасидаги узоқ давом этган ҳамкорликнинг бошланиши бўлди. “Иван Василевич касбини ўзгартиради” фильмидаги Уляна Андреевна образи Наталянинг унинг нақадар серқирра актриса эканлигини намоён этган.
Наталя Крачковскаянинг эри вафотидан кейинги ҳаёти
Крачковский Наталя эллик ёшга кирганда вафот этди. Севимли турмуш ўртоғини йўқотиш актриса учун оғир зарба бўлди, унга фақат набираси Володянинг туғилиши таскин берди. Наталя эркаклар орасида машҳур бўлишига қарамай, бошқа турмуш қуришга журъат эта олмади. Крачковскаянинг тан олишича, унга бир неча марта таклиф бўлган, лекин у ҳар доим рад жавобини берган, боиси Владимирга ўхшаганлар барибир энди йўқ эди.
Шахсий ҳаёт ўрнига актриса ўғли, набираси ва карьерасига бутун эътиборини қаратди. Ҳатто юрак муаммолари туфайли оғир аҳволда бўлса-да, Наталя театр саҳнасида чиқишларини давом эттирди: аввалига юриб, кейинчалик эса аравачада саҳнага чиқарди. Актриса 2016 йилда ҳаётдан кўз юмди. Афсуски, Крачковскаянинг ўғли ва набираси билан илиқ муносабатлари унинг вафотидан бир неча йил олдин бузилган эди.
Ота-бола Наталя гўёки жазмани ҳақида гапирган интервьюсини уюштирган журналистга ишониб, оғир касал ҳолатдаги актрисадан шунчаки юз ўгиришди. Аммо Наталя ўлимига яқин синглиси Ирина билан учрашишга муваффақ бўлди. Улар йигирма беш йилдан бери айро яшаётган эди. Опа-сингиллар қувончдан йиғлаб, кун бўйи болаликлари ҳақида мириқиб суҳбатлашишган.
Изоҳ (0)