Бугун, 23 июль куни Тошкент вилояти Қибрай тумани “Ғафур Ғулом” МФЙ Алишер Навоий кўчасида жойлашган яшаш уйи ва қурилиш моллари дўконида ёнғин содир бўлди.
Ёнғин кучли алангани келтириб чиқарган. Дўкон биноси бутунлай ёниб кетган, атрофни қора тутун қоплаган. Воқеа жойидаги фуқаролар ёнғин ўчириш ишларида фаоллик кўрсатган.
“Кўчага чиқишим билан оловни кўриб, қўрқиб кетдим. Ҳеч кимнинг бошига тушмасин. Бирдан тез ёрдам чақиришди, хонадонлардаги ҳамма болаларни кўчага олиб чиқдик. Ҳамма қўлдан келганча ёрдам берди”, дейди аҳоли вакилларидан бири.
Туман ФВБга ёнғин чиққани тўғрисида соат 10:57 да мурожаат келиб тушган ва зудлик билан ҳодиса жойига 5 та ёнғин-қутқарув экипажи етиб борган.
“Қурилиш моллар дўкони ҳамда ёнидаги яшаш хонадонларда ёнғин бўлаётгани ҳақида хабар келиб тушди. Ёнғин соат 11:17 да қуршаб олинди ва 11:50 да бартараф этилди. Ёнғин оқибатида тан жароҳати олганлар йўқ. Яшаш хонадонлари ва хўжалик моллари дўконида умумий ҳисобда 340 квадрат майдонда биноларнинг том қисми ҳамда ички қисмига зарар етган”, дейди Тошкент вилояти Қибрай тумани ФВБ инспектори Хайриддин Набиев.
“Тахминан 11:00 ларда резинанинг куйган ҳиди чиқа бошлади. Ҳамма жой тутун бўлиб кетди. Қўшни “сварка” қилган экан, шундан чиқди дейишяпти. Уйларнинг ичи сувга тўлиб қолган”, дейди қўшни хонадонда яшовчи фуқаро.
Ҳодиса оқибатида тан жароҳати олганлар тўғрисида расмий мурожаат келиб тушмаган. Бироқ воқеа гувоҳларининг айтишича, бир фуқаронинг оёғи енгил даражада куйган. Ёнғинга эҳтимолий сабаб сифатида пайвандлаш ишларида хавфсизликка риоя қилинмагани кўрсатилмоқда. Айни вақтда ёнғиннинг аниқ сабаблари ва етказилган моддий зарар миқдори мутасадди ташкилотлар томонидан ўрганилмоқда.
Ёнғин юз берган қурилиш моллари дўкони тахминан 10 йилдан буён фаолият юритиб келган.
Изоҳ (0)