ЮНЕСКО бош директори Одре Азуле АҚШнинг ташкилотдан чиқиш қарори юзасидан афсусдалигини билдириб, айни пайтда воқеаларнинг бундай ривожланишини кутилган ҳодиса деб атади.
“Мен президент Дональд Трампнинг Америка Қўшма Штатларини ЮНЕСКОдан яна олиб чиқиш қароридан чуқур афсусдаман. Бу қарор 2026 йил декабрь ойи охирида кучга киради. Ушбу қарор кўп томонламаликнинг асосий тамойилларига зид бўлиб, биринчи навбатда, Америка Қўшма Штатларидаги кўплаб ҳамкорларимизга - объектларни Жаҳон мероси рўйхатига киритиш, “Ижодкор шаҳар” мақомини олиш ва университет кафедраларини ташкил этишга интилаётган ҳамжамиятларга таъсир кўрсатиши мумкин”, деди Азуле.
Унинг таъкидлашича, бу қарор “кутилган ва ЮНЕСКО унга тайёргарлик кўрган”.
Азуле сўнгги йилларда таркибий ислоҳотлар ва “молиялаштириш манбаларини хилма-хил қилиш” амалга оширилганини эслатган. Ҳозирда АҚШнинг ҳиссаси ташкилот умумий бюджетининг 8 фоизини ташкил этишини билдирган.
“Айни пайтда ташкилот ҳеч қандай қисқартиришлар имкониятини кўриб чиқмаяпти”, дея таъкидлади у.
ЮНЕСКО Бош директори 2018 йилда АҚШ Трампнинг биринчи президентлик муддатида ташкилот билан ҳамкорликни давом эттиришдан худди шундай тарзда бош тортганида “вазият тубдан ўзгаргани” ва ташкилотдаги сиёсий кескинлик юмшаганига қарамай, “айнан ўша сабаблар” келтирилганини эслатган.
“Бу даъволар, шунингдек, ЮНЕСКОнинг саъй-ҳаракатлари, айниқса, Холокост таълими ва антисемитизмга қарши кураш соҳасидаги фаолияти ҳақиқатга зиддир”,- дея қўшимча қилди у Оқ уй вакилининг “Исроилга қарши ва яҳудийларга қарши ташаббуслар”ни илгари суриш ҳақидаги даъволарига жавобан.
Азуле Вашингтондаги амалдаги маъмурият қароридан қатъи назар, ЮНЕСКО “ресурсларнинг муқаррар қисқаришига қарамай, вазифаларни бажаришда давом этиши”ни ма`лум қилган. Унинг таъкидлашича, ЮНЕСКО АҚШни “доимо қутлайди" ва хусусий сектор ҳамда академик доиралардаги америкалик ҳамкорлар билан ҳамкорликни давом эттиради, шунингдек, ушбу мамлакат ҳукумати билан мулоқотни давом эттириш ниятида.
Бундан аввал АҚШ президенти Дональд Трамп мамлакатни БМТнинг Таълим, фан ва маданият масалалари бўйича ташкилоти (ЮНЕСКО) таркибидан чиқаришни режалаштираётгани, бунга сабаб сифатида ташкилотнинг Америкага ва Исроилга қарши кайфиятини, шунингдек, “воукизм”дан норозилигини кўрсатаётгани ма`лум қилинганди.
Изоҳ (0)