АҚШнинг Ford автогиганти ёнилғи сизиб чиқиши муаммоси туфайли 694 минг 271 та кроссоверини қайтариб олишга қарор қилди. Бу ҳақда АҚШ Йўл ҳаракати хавфсизлиги миллий бошқармасига (NHTSA) асосланиб, Reuters ахборот агентлиги хабар берди.
Маълум қилинишича, ушбу қарор қабул қилинишидан олдин бир йиллик тергов ўтказилган. Тергов натижасида қайтариб олиниши керак бўлган автомобиллардаги ёнилғи форсункаларининг ёрилиш эҳтимоли аниқланган. Бу эса ёнилғининг двигатель бўлимига сизиб чиқиши ва ёнғин чиқишига сабаб бўлиши мумкин.
2021-2024 йилларда ишлаб чиқарилган Bronco Sport ва 2020-2022 йилларда ишлаб чиқарилган Escape русумидаги 1,5 литрли двигателлар билан жиҳозланган баъзи моделларни қайтариб олиш режалаштирилган. Бошқарма ушбу нуқсон автомобилларнинг 0,3 фоизида учраши мумкинлигини тахмин қилмоқда. Қайтариб олиш жараёнининг умумий қиймати автогигантга тахминан 570 миллион долларга тушади.
Йўл ҳаракати хавфсизлиги миллий маъмурияти маълумотларига кўра, Ford ёнилғи пуркагичлари муаммосини 2022 йилдан бери ўрганмоқда. Компаниянинг жойлардаги текширув қўмитаси 2022 йил ноябрь, 2024 йил март ва 2025 йил март ойларида қайтариб олишни маъқуллаган. Бу даврда компания дастурий таъминот янгиланишларини амалга оширган.
Агентликнинг таъкидлашича, муаммоли автомобиль эҳтиёт қисмлари Италиянинг Dumarey Flowmotion Technologies компанияси томонидан етказиб берилган. Июль ойида Ford саккизта автомобилнинг ёнилғи пуркагичлари ёрилганини аниқлади. Бу автомобиллар таъмирланганига қарамай, капот остида ёнғин чиқди.
Изоҳ (0)