Айше Барим — турк киносаноатининг энг нуфузли шахсларидан бири бўлиб, ярим йилдан буён “ҳукуматни ағдаришга уринишга кўмаклашиш” айблови билан ҳибсда сақланмоқда. Туркия телевидениесининг аксарият юлдузлари билан ҳамкорлик қилувчи ID агентлиги асосчиси ҳибсга олинганидан олти ой ўтиб суд олдида жавоб берди, деб хабар бермоқда Туркиянинг Cumhuriyet нашри.
Суд залига ўнлаб таниқли актёр ва актрисалар шахсан келиб, Баримни қўллаб-қувватлашларини билдиришди. Улар орасида “Муҳташам юз йил” фильмидаги султон Сулаймон ролини ижро этган Халит Эргенч, унинг рафиқаси Бергузар Корел, шунингдек, Серенай Сарикая, Ҳанде Эрчел, Зеррин Текиндор, Ипек Билгин ва бошқалар бор. Уларнинг иштироки ҳокимият томонидан кучайиб бораётган босим ва жиноий ишларга аралашиш хавфига қарамай, кучли бирдамлик ишораси бўлди.
Судда сўзга чиққан Айше Барим кўз ёшларини тия олмади: “Мен бу жазони адолатсиз ва номутаносиб деб ҳисоблайман. Мен яшаш ҳуқуқимни ва инсоний қадр-қимматимни қайтариб олмоқчиман. Мен яшашни хоҳлайман.” Унинг сўзларига кўра, у соғлиғига таҳдид соладиган шароитда сақланмоқда ва тиббий ёрдамга муҳтож, бироқ ҳозирча буларни тўлиқ ҳажмда ололмаяпти.
Суд жамоатчилик босимига қарамай, Баримни ҳибсда қолдиришга қарор қилди. Навбатдаги мажлис 1 октябрга белгиланган.
Айблов версиясига кўра, 2013 йилда Гези боғидаги норозилик намойишлари чоғида Барим гўёки ўз профессионал алоқаларидан фойдаланиб, актёрларни намойишларда иштирок этишга ва ижтимоий тармоқларда норозилик материалларини эълон қилишга ундаган. ID агентлигига алоқадор актёрларнинг таъкидлашича, улар норозилик намойишларида ихтиёрий равишда қатнашган.
Изоҳ (0)