Қозоннинг “Рубин” клуби собиқ ҳимоячиси Рустам Ашурматов Россиянинг Championat нашрига интервью бериб, АҚШ, Канада ва Мексика мезбонлик қиладиган футбол бўйича Жаҳон чемпионати олдидан Ўзбекистон терма жамоасининг имкониятлари ҳақида фикр билдирди.
Унга кўра, Ўзбекистон терма жамоаси октябрь ойидаги йиғинда Аргентина ва Уругвай терма жамоалари билан ўртоқлик учрашуви ўтказишни мақсад қилган:
Олдиндан башорат қилишни ёқтирмайман. Лекин биз гуруҳдан чиқиш ва турнирда муносиб иштирок этиш учун ҳаракат қиламиз. Икки йил аввал Мексика билан 3:3 ҳисобида дуранг ўйнадик, Боливияни 1:0 ҳисобида мағлуб этдик ва АҚШга 0:3 ҳисобида имкониятни бой бердик. Аммо ўйин борасида улардан қолишмадик, дея оламан. Шундай экан, гуруҳдан чиқа оламиз деб умид қиламан. Мундиал олдидан Уругвай ва Аргентина терма жамоаларига қарши ўртоқлик ўйинлари ҳам режалаштирилган. Бу эса бизга тайёргарлик вазифасини ўтаб беради, — деди Рустам Ашурматов Championat нашрига берган интервьюсида.
Маълумот учун, Ашурматов “Рубин”дан Эроннинг “Истиқлол” клубига ўтди. Теҳронликлар ҳимоячи учун Қозон клубига 450 минг евро тўлаган.
Изоҳ (0)