Ўзбекистон мезбонлик қиладиган U-20 Осиё Кубоги—2023 гуруҳ босқичига қуръа ташланди

2023 йилда Ўзбекистонда бўлиб ўтадиган 20 ёшгача бўлган футболчилар ўртасидаги Осиё Кубогига қуръа ташланди.

Ўзбекистон U-20 терма жамоси мезбон сифатида А гуруҳидан жой олди. Ўзбекистон гуруҳда Ироқ, Сурия ва Индонезия ёшларига қарши ўйнайди.

U-20 Осиё Кубоги—2023 мусобақаси 1—18 март кунлари бўлиб ўтади. Ўзбекистон ўз ўйинини 1 март куни Сурияга қарши баҳс билан бошлайди.

Мусобақада иштирок этадиган 16 жамоадан энг яхши 4 та терма жамоа Индонезияда бўлиб ўтадиган U-20 Жаҳон Чемпионати йўлланмасини қўлга киритади. Индонезиянинг ўзи ярим финалга қадар етиб борса, чорак финалда мағлуб бўлган энг яхши натижага эга икки терма жамоа ўртасида баҳс ўтказилади ва ғолиб ОФК вакили сифатида мундиалга йўлланмага эга чиқади.