Бугун, 10 июль куни президент Шавкат Мирзиёев Чилонзор туманидаги индустриал ҳудудда жойлашган “Эман материалс” корхонасида бўлди. Бу ҳақда Президент матбуот хизмати хабар берди.
-t9yRiLgk.avif)
Манбага кўра, Ўзбекистонда тўқимачилик, қурилиш материаллари, мебелсозлик соҳаларида бир миллион нафарга яқин аҳоли ишламоқда. Мамлакатда мебелсозликка ихтисослашган 7 минг 500 та корхона фаолият юритмоқда. Ўтган йилнинг ўзида 920 та янги корхона очилган. Соҳада 6,7 триллион сўмлик маҳсулот тайёрланиб, 20 миллион долларлик мебел экспорт қилинган.
Хабар қилинишича, Чилонзор туманидаги индустриал ҳудудда мебелсозликка ихтисослашган ўнга яқин ширкат мавжуд. “Эман материалс" корхонаси 10 миллион доллар маблағи эвазига ташкил топган. Бу ерда йилига 10 минг тонна фурнитура ва мебелсозлик буюмлари ишлаб чиқарилмоқда. Улар кооперация асосида мамлакатдаги минглаб корхоналарга етказиб бериляпти. Корхонада 200 киши иш билан таъминланган. Аҳамиятлиси, шу ернинг ўзида мебелсозлик ўқув маркази ҳам ташкил этилган. Бунинг учун Италия ва Туркия каби давлатлардан мутахассислар жалб қилинган.
-uiSMfonl.avif)
Корхона томонидан буюртма асосида мебел ишлаб чиқариш, лойиҳалаштириш, кесиш, ускуналарни таъмирлаш каби қўшимча хизматлар ҳам кўрсатилади. Мажмуада кўргазма зали ҳам ташкил этилган бўлиб, бу ерда пойтахтдаги номдор – бренд маҳсулотлар бир жойга жамланган. Бу тизим сотувчи, хизмат кўрсатувчи ва олувчига қулайлик яратмоқда.
Давлат раҳбари корхонадаги иш жараёнини кўздан кечириб, мутахассислар билан суҳбатлашди. Мебелсозлик тармоғида маҳаллийлаштириш ва қўшилган қиймат яратиш бўйича ҳали фойдаланилмаган жуда кўп имконият борлиги кўрсатиб ўтилди.
Президентга Чилонзор туманида ташкил этилган “Ислоҳотлар штаби” фаолияти ҳақида ахборот берилди. Аҳоли бандлигини таъминлаш, камбағалликни қисқартиришга қаратилган янги таклифлар ва кутилаётган натижалар кўриб чиқилди.
-91KoOTwW.avif)
“Туманда жорий йил бошида камбағаллик даражаси 7 фоиздан юқорироқ бўлган бўлса, биринчи ярим йиллик якунлари бўйича бу рақам 2,2 фоизга тушган. Манзилли режага кўра, туманни йил якунига қадар камбағаллик ва ишсизликдан холи ҳудудга айлантириш мақсад қилинган. Бунинг учун оилалар имкониятини юзага чиқариш, микролойиҳаларни амалга ошириш, янги тадбиркорлик субъектларини ташкил қилиш, норасмий иш ўринларини қонунийлаштириш чоралари кўрилади”, дейилади манба ахборотида
Мулоқотда президент аҳоли бандлигига қаратилган ташаббусларни ҳамиша қўллаб-қувватлашини билдирган. Инвестицияларни жалб этиб, имкониятларни лойиҳага айлантириш, кичик корхоналар фаолиятини кенгайтириш зарурлигини таъкидлаган. Иқтисодиёт ва инвестиция соҳалари масъулларига тадбиркорлар билан доимий учрашиб, муаммоларини ҳал этиш, таклифларини юзага чиқариш бўйича топшириқлар берилган.
Изоҳ (0)