Президент Шавкат Мирзиёев автомобиль ҳайдаш жараёнида тирбандликда қолганини айтиб, муаммо юзасидан ички ишлар вазирига танбеҳ берди.
Бугун, 9 июль куни йўл ҳаракати хавфсизлигини таъминлаш ва инфратузилмани яхшилашга доир йиғилиш ўтказилди. УзА эълон қилган видеога кўра, мажлисда йўллардаги тирбандлик масаласи ҳам кўтарилган.
“Ўтган якшанба куни рулда келаётган эдим. Ўзим ҳам ҳамма билан 15-20 дақиқа яхшигина тирбандликда турдим. Кўчага чиқиб: ‘ҳой фалончи менга йўлни очиб бер’, деб бақирмайман-ку, эл қатори келдик. Ўтиб бўлганимдан кейин вазирга телефон қилдим. ‘Сен келиб ўзинг ўтгин қани’, дедим. Одамлар шундай ҳолатда кечаси уйга қайтаётганда кайфияти ёмон томонга ўзгарадими ёки йўқми”, дея ички ишлар вазирига танбеҳ берган давлат раҳбари.
Йиғилишда Ўзбекистонда йўл ҳаракати хавфсизлиги соҳасида ечимини кутаётган муаммолар кўплигига ҳам урғу берилган. Масалан, 2024 йилда республикада 9 минг 364 та йўл-транспорт ҳодисаси содир бўлган. Оқибатда 9 минг фуқаро жароҳат олган, 2 минг 203 нафар одам ҳалок бўлган. Энг кўп ўлим ҳолатлари Самарқанд, Тошкент ва Фарғона вилоятларида қайд этилган.
Жорий йилнинг олти ойида 20 та ҳудудда авариялар сони юқорилигича қолмоқда.
“Афсуски, ҳар тўртинчи аварияда бир киши ёки кунига ўртача 6 киши вафот этаётгани барчани қаттиқ ташвишга солиши керак”, деган президент масъулларга.
Изоҳ (0)