Қамчиқ довонида бир кунда — 24 июль куни юк машиналари билан боғлиқ иккита автоҳалокат содир бўлди.
ЙҲХХ ахборот хизматининг маълум қилишича, 24 июль куни соат 17:30 ларда “Қамчиқ” довони ҳудудидан ўтувчи А-373 автомобиль йўлининг 243-километрида Sinotruk Howo русумли юк транспорт воситасининг ҳайдовчиси бошқарувни йўқотгани сабабли автомобиль йўл четига ағдарилган. Тан жароҳати олган ёки вафот этганлар йўқ. Ҳайдовчига амалий ёрдам кўрсатилиши вақтида қисқа тирбандлик юзага келган.
Шунингдек, ФВВ ҳам яна бир автоҳалокат тўғрисида маълумот берди. Унга кўра, 24 июль куни соат 16:53 да А-373 Тошкент—Ўш автомобиль йўлининг 242.2 км.да Тошкент—Водий йўналишида ҳаракатланган DAF русумли юк машина ҳайдовчиси эҳтиётсизлиги оқибатида йўл ўртасида қайчи усулида тўхтаб қолган. Натижада ёқилғиси оқиб кетган. Унинг ортидан келаётган CIМC русумли қурилиш маҳсулоти ташишга мўлжалланган автомашина тойиб кетиб йўл четидаги хандаққага тушиб кетган.
Ҳодиса жойига ФВВнинг “Қамчиқ” довони қутқврувчилари етиб бориб, ЙПХ ва “Қамчиқавтойўл” ходимлари билан ҳамкорликда вазият оқибатларини бартараф этмоқда. Йўл транспорт ҳодисаси оқибатларини бартараф этиш вақтида йўлнинг бир томони вақтинча ёпилган.
Ҳодиса оқибатида тан жароҳати олган ва ҳалок бўлганлар йўқ.
Изоҳ (0)