Мамлакатга олти ойда 122 минг тоннадан ортиқ гўшт маҳсулотлари импорт қилинди (бир йил аввалги кўрсаткич 75 минг тонна). Бу ҳақда Божхона қўмитаси эълон қилган жадвалда қайд этилган.
Жорий йил январь—июнь ойларида Ўзбекистонга умумий қиймати 338,8 минг долларлик гўшт маҳсулотлари импорт қилинди. Таққослаш учун, 2024 йил мос давридаги импорт ҳажми 193,7 минг доллар бўлган.
Дастлабки олти ойда хориждан қиймати 266,9 минг долларлик 66 минг тонна мол гўшти сотиб олинган. Бунда бир кило гўшт нархи ўртача 4,04 доллардан тўғри келади. Ўтган йил мос даврида 139,3 минг долларлик 35,2 минг тонна мол гўшти импорт қилинганди.
2025 йилнинг I ярим йиллигида чет элдан қиймати 31,83 минг долларлик 27,3 минг тонна товуқ гўшти сотиб олинган. Ўз навбатида 15,74 минг долларлик 15 минг тонна гўшт субмаҳсулотлари (чорва ҳайвонларининг гўштдан ташқари истеъмол қилинадиган ички органлари ва тана қисмлари) импорти амалга оширилган. Шунингдек, 14 минг долларлик 11,1 минг тонна қўй гўшти харид қилинган.
Божхона қўмитаси жорий йил июнидаги рақамларни ҳам очиқлаган. Ўтган ойда мамлакатга жами 70,6 минг долларлик гўшт маҳсулотлари импорт қилинган бўлса, шунинг 52,9 минг долларлик қисми мол гўштига тўғри келган. Май ойида 71,2 минг долларлик гўшт маҳсулотлари импорт қилинган. Шундан 57,8 минг долларлик қисми мол гўшти бўлган.
Июнь маълумотларида гўшт субмаҳсулотлари импорти беш карра ошганини кўриш мумкин. Мазкур турдаги маҳсулотлар импорти йиллик ҳисобда қўй гўшти импортини ортда қолдирган. Ой давомида мол гўшти ўртача 4,01 доллардан, товуқ гўшти 1,09 доллардан, қўй гўшти эса 1,41 доллардан импорт қилинганини кўриш мумкин.
Изоҳ (0)