Mamlakatga olti oyda 122 mln tonnadan ortiq go‘sht mahsulotlari import qilindi (bir yil avvalgi ko‘rsatkich 75 mln tonna). Bu haqda Bojxona qo‘mitasi eʼlon qilgan jadvalda qayd etilgan.
Joriy yil yanvar—iyun oylarida O‘zbekistonga umumiy qiymati 338,8 mln dollarlik go‘sht mahsulotlari import qilindi. Taqqoslash uchun, 2024-yil mos davridagi import hajmi 193,7 mln dollar bo‘lgan.
Dastlabki olti oyda xorijdan qiymati 266,9 mln dollarlik 66 mln tonna mol go‘shti sotib olingan. Bunda bir kilo go‘sht narxi o‘rtacha 4,04 dollardan to‘g‘ri keladi. O‘tgan yil mos davrida 139,3 mln dollarlik 35,2 mln tonna mol go‘shti import qilingandi.
2025-yilning I yarim yilligida chet eldan qiymati 31,83 mln dollarlik 27,3 million tonna tovuq go‘shti sotib olingan. O‘z navbatida 15,74 mln dollarlik 15 mln tonna go‘sht submahsulotlari (chorva hayvonlarining go‘shtdan tashqari isteʼmol qilinadigan ichki organlari va tana qismlari) importi amalga oshirilgan. Shuningdek, 14 mln dollarlik 11,1 mln tonna qo‘y go‘shti xarid qilingan.
Bojxona qo‘mitasi joriy yil iyunidagi raqamlarni ham ochiqlagan. O‘tgan oyda mamlakatga jami 70,6 mln dollarlik go‘sht mahsulotlari import qilingan bo‘lsa, shuning 52,9 mln dollarlik qismi mol go‘shtiga to‘g‘ri kelgan. May oyida 71,2 mln dollarlik go‘sht mahsulotlari import qilingan. Shundan 57,8 mln dollarlik qismi mol go‘shti bo‘lgan.
Iyun maʼlumotlarida go‘sht submahsulotlari importi besh karra oshganini ko‘rish mumkin. Mazkur turdagi mahsulotlar importi yillik hisobda qo‘y go‘shti importini ortda qoldirgan. Oy davomida mol go‘shti o‘rtacha 4,01 dollardan, tovuq go‘shti 1,09 dollardan, qo‘y go‘shti esa 1,41 dollardan import qilinganini ko‘rish mumkin.
Izoh (0)