Бред Питт иштирокидаги “Ф1” фильми Appleънинг энг кўп даромад келтирган картинасига айланди

Бред Питт бош ролни ижро этган “Ф1” (“Формула 1”) фильми жаҳон кинопрокатида ўн кун ичида 293 миллион доллар даромад келтирди ва Apple’нинг энг кўп касса йиғган картинасига айланди, деб хабар бермоқда Variety.

Фильмни ишлаб чиқариш учун реклама бюджетини ҳисобга олмаганда 250 миллион доллар сарфланган. Одатда прокатда ўзини оқлаш учун картина ўз бюджетидан 2,5 баравар кўп даромад келтириши керак, бу ҳолда реклама харажатлари қопланади ва кинотеатрларга борадиган маблағнинг бир қисми ҳам ҳисобга олинади, деб ёзади Сcреен Рант.

Мақолада таъкидланганидек, рекорд ўрнатиш унчалик қийин бўлмаган. Apple жаҳон кинопрокатига атиги бешта картина чиқарган, улардан иккитаси муваффақиятсизликка учраган — булар Скарлетт Йоханссон ва Ченнинг Татум иштирок этган “Менга Ойни кўрсат” ҳамда Генри Кавилл қатнашган “Аргайл: Супержосус” фильмларидир. Биринчи лента жаҳон прокатида 42 миллион доллар, иккинчиси эса 96 миллион доллар йиғган. Қолган икки лойиҳанинг касса йиғими бир оз юқорироқ. “Гул ой қотиллари” фильми ҳисобида 158 миллион доллар мавжуд. Режиссёр — Мартин Скорсезе, бош ролни Леонардо Ди Каприо ижро этган. Ридли Скоттнинг “Наполеон” фильми кассаси 221 миллион долларни ташкил этган. Тасмада француз императори образини Хоакин Феникс гавдалантирган.

Питтнинг айтишича, у “Ф1” фильми суратга олишига тайёргарлик кўриш жараёнида пойга машиналарида 6 минг милдан (9 656 км) ортиқ масофа босишга мажбур бўлган. У истиқболли янги ҳайдовчи Жошуа Пирсга (Демсон Идрис) устоз сифатида пойга оламига қайтган собиқ пойгачи Сонни Хейс ролини ижро этди. Фильмда шунингдек, Хавер Бардем, Керри Кондон ва Тобаяс Мензис ҳам рол ўйнаган.

Фильм ишонарлилик ва табиийликка эришиш учун актёрлар “Формула 1” пойгачилари, жумладан, етти карра жаҳон чемпиони Льюис Хемилтон (фильмннинг продюсерларидан бирига айланган) билан ҳамкорлик қилишди. Режиссёр — Жозеф Косински. У бир йил давомида кадрлар режасини тузиш билан шуғулланган, унинг фильмидаги деярли барча саҳналар ҳақиқий воқеалардан илҳомланиб олинган. Асосий эпизодлар бутун дунё бўйлаб “Формула 1” трассаларида суратга олинган.