Суратга олиш жараёнида жароҳат олишдан ҳеч ким суғурталанмаган ва буни юлдузлар жуда яхши тушунади. Уларнинг айримлари ҳатто каскадёрлар хизматидан воз кечиб, онгли равишда хавфга киришган. Ушбу мақолада энг дадил ва жасур актёрлар ҳақида билиб оласиз.
Леонардо ДиКаприо
Кўпчилик Квентин Тарантинонинг “Озод қилинган Жанго” вестернидаги лавҳани эслайди, унда Леонардо ДиКаприонинг қаҳрамони ғазаб билан қўлини столга уради ва шиша стаканни синдириб қўлини жароҳатлайди. Аммо кўпчилик бу импровизация бўлганини билмайди. ДиКаприо тасодифан жароҳат олган, лекин қон кетаётганига қарамай ўйнашни давом эттирган. Натижада Келвин Кенди образини жуда шафқатсиз инсон сифатида кўрсатган бу ёрқин эпизод якуний монтажга киритилган ва актёрнинг касбига садоқатини намоён қилган.
Силвестр Сталлоне
Авваллари Слай каскадёрлар ёрдамисиз трюклар бажариши билан машҳур эди. Бироқ бундай фидойилик кўпинча жиддий оқибатларга олиб келади. “Енгилмаслар” фильмини суратга олаётганда, Стив Остин образидаги қаҳрамон билан жанг саҳнасида Силвестр Сталлоне елкасини чиқарган ва бўйин умуртқасини синдириб олган. Актёр бир нечта операцияларни бошдан кечирган, ҳаттоки металл пластинка ўрнатишга тўғри келган. Ушбу воқеадан кейин Сталлоне ҳамкасбларини каскадёрлардан бутунлай воз кечмасликка чақирган.
Даниэль Крейг
Жеймс Бонд роли британиялик актёрдан нафақат актёрлик маҳоратини, балки жисмоний чидамлиликни ҳам талаб қилган. “Казино Роял” фильмида ишлаш жараёнида унинг иккита олд тиши синган. Аммо Даниэль Крейг учун ҳақиқий синов “Тасалли кванти” фильмини суратга олиш вақтида бўлган. У мушак ёрилиши, бир нечта қовурға синиши ва юзига саккизта чок қўйилиши керак бўлган жароҳатларни олган.
Бир сафар Крейг ҳаттоки бармоғининг бир қисмини кесиб олган, бунинг оқибатида уни зудлик билан касалхонага ётқизишга тўғри келган. “007: СПЕКТР” фильми устида ишлаётганида эса тиззасини чиқариб олган, бу эса суратга олишни кечиктиришга мажбур қилган.
Маргарет Куолли
Машҳур “Субстанция” бадиий фильмида ўйнаган ёш юлдуз жиддий муаммоларга дуч келган. Ҳар куни юзига мураккаб грим қилишга тўғри келган, бу эса Маргарет Куоллида акне (юз терисининг яллиғланиши) пайдо бўлишига олиб келган. Унинг юзи шунчалик яллиғланганки, финал саҳналарида режиссёр Куоллини фақат маълум бурчак остидан суратга олишга мажбур бўлган. Актрисанинг юз териси яхшиланишига бир йил кетган. Қизиғи шундаки, кейинги “Меҳр турлари” фильмида Маргарет образидаги қаҳрамон ҳам акне билан қийналади. Куолли ҳазил билан бу сафар грим керак бўлмаганини айтган.
Ченнинг Татум
“Бўрилар овчиси” спорт драмасини суратга олаётганда Ченнинг Татум ўз образига шунчалик кириб кетганки, бир саҳнада бошини бутун кучи билан ойнага урган. Жароҳат олган Татум тезда касалхонага ётқизилган, аммо кадр фильмга киритилган.
Яна бир ҳодиса “Тўққизинчи легион бургути” фильмини суратга олаётганда содир бўлган. Қаҳрамонлар музли дарёга шўнғиш саҳнасида ёрдамчилар актёрлар костюмига иссиқ сув қуяётган бўлишган. Улардан бири тасодифан Татумга қайнаган сув қуйиб юборган — актёр кучли куйиш олган ва зудлик билан касалхонага юборилган. Ченнинг бу воқеани кейин ҳазил билан эслаб берган.
Ума Турман
“Килл Билл” жангари фильмида Турман кабриолетни бошқариши керак бўлган, бироқ у машинани хавфли деб ўйлаган. Режиссёр автомобиль техник жиҳатдан соз эканини таъкидлаб, уни ишонтирган ва актриса рози бўлган. Сценарий бўйича у қумли йўлдан ҳайдаши керак эди, шунда унинг сочлари шамолда ҳилпираши мумкин эди. Маълум бир вақтда Ума машинани бошқара олмай қолган ва автомобиль дарахтга урилган. Авария натижасида Турман бош мия чайқалиши, бўйин ва оёқ жароҳатлари олган. Тарантино ушбу саҳнани суратга олишга мажбур қилганидан чуқур афсусланган, аммо уларнинг муносабатлари ёмонлашган.
Том Круз
Машҳур Голливуд актёри Том Круз кўп марта суратга олиш майдонида ўзини хавф остига қўйган. “Имконсиз миссия: оқибатлар” фильмини суратга олаётганда у бир бинодан бошқасига сакраётганда деворга урилиб, товон суягини синдириб олган. Жароҳатга қарамай, Круз ўз трюкини якунлаган, аммо воқеа студияга жуда қимматга тушган.
Суратга олиш икки ойга кечиктирилган.
Никол Кидман
“Қизил тегирмон” мусиқий фильмидаги суратга олиш ишлари Никол Кидман учун оғир синов бўлди. Рақс саҳналаридан бирида актриса мувозанатни йўқотган ва уни ушлашга уринган Юен МакГрегор буни уддалай олмаган. Кидман эса қовурғасини синдириб олган. Кейинчалик, костюмни кийиб кўриш вақтида қаттиқ боғланган корсет сабаб қовурға яна синган. Бундан ташқари, навбатдаги рақс саҳнасининг репетицияси вақтида Кидман йиқилиб, тиззасини жароҳатлаган.
Вигго Мортенсен
“Узуклар ҳукмдори” эпик фильмини суратга олаётганда Арогорн образидаги актёр Вигго Мортенсен энг кўп жароҳат олган актёрлардан бири бўлган. У қаҳрамон оркнинг дубулғасини куч билан тепган, сўнгра икки оёқ бармоғини синдириб олган ва оғриқдан бақирган. Бу саҳна кинога драматизм қўшган ва режиссёр Питер Жексон дубляжни фильмда қолдиришга қарор қилган. Яна бир жанг саҳнасида Вигго тишини синдириб олган, аммо актёр уни вақтинча ёпиштириб, суратга олишни давом эттиришни хоҳлаган.
Холли Берри
“Мушук аёл” ва “Х-Одамлар” фильмларидаги роллари билан машҳур бўлган Холли Берри ҳам хавфли саҳналардан чўчимайди. Суратга олишлар учун актриса жиу-жицу, бокс, кикбоксинг ва таэквондони ўрганган, шунингдек, ўқотар қурол билан ишлашни ҳам ўзлаштирган. Аммо бундай тайёргарликларга қарамай, жароҳатлардан қутула олмаган. Берри қўл, думғаза, иккита оёқ бармоғи, қўлнинг ўрта бармоғи ва бир неча қовурғасини синдириб олган. “Зарба” драмасини суратга олаётганда актриса қовурғасини синдириб олган, лекин суратга олишни тўхтатмаган ва оғриққа чидаган.
Изоҳ (0)