“Манчестер Сити”нинг ўзбекистонлик ҳимоячиси Абдуқодир Ҳусанов Клублар ўртасидаги Жаҳон чемпионатининг 2-тури доирасидаги “Ал-Айн”га қарши ўйинда майдонга тушди. Учрашувни асосий таркибда бошлаган Ҳусанов 61-дақиқада захирага олинди.
Статистик маълумотларга кўра, Ҳусанов 61 дақиқа ичида 80 марта тўпга тегинган. У 68 та узатма амалга ошириб, уларнинг 63 таси шерикларига аниқ етиб борган — 93 фоиз.
Ҳусанов ўйин давомида 6 марта тўп учун кураш олиб борган ва уларнинг 2 тасида муваффақиятга эришди. У 2 марта ҳаводаги курашда қатнашиб, ҳар икки ҳолатда ҳам рақибларидан устун келди. Шунингдек, у битта калит пас амалга оширишга муваффақ бўлди. Шунингдек, у 5 марта узоқ масофага узатма амалга оширган бўлиб, уларнинг 4 таси аниқ манзилга етиб борган. Ҳимоячи 58-дақиқада сариқ карточка билан огоҳлантирилди.
Sofascore портали Ҳусановнинг ўйинини 7,1 балл билан баҳолади. Бу кўрсаткич “Манчестер Сити” таркибидаги футболчилар орасида ўртача натижалардан бири ҳисобланади.
Учрашувнинг энг яхши футболчиси деб икки гол муаллифи бўлган Илкай Гундўған эътироф этилди. У майдонда 90 дақиқа ҳаракат қилди ва Sofascore талқинига кўра, энг юқори баҳони олди — 9,2. Асосий таркибда ўйнаган футболчилар орасида энг паст баллни 6,8 кўрсаткич билан Нико Гонсалес олди.
Рақиб жамоа — “Ал-Айн” сафида энг яхши баҳо 6,4 балл билан марокашлик ҳужумчи Софиан Раҳимига берилди.
Эслатиб ўтамиз, “Манчестер Сити” бу учрашувда “Ал-Айн”ни 6:0 ҳисобида мағлуб этиб, гуруҳ босқичидаги иккинчи ғалабасини қўлга киритди. Гвардиола жамоаси мусобақанинг 3-турида “Ювентус” билан тўқнаш келади. Учрашув 27 июнь куни бўлиб ўтади.
Изоҳ (0)