Maktabgacha va maktab taʼlimi vazirligi tomonidan o‘tkazilgan tanlovlarining Respublika bosqichi sinov jarayonlari Samarqand shahrida tashkil etildi. Taqdirlash marosimida Prezident yordamchisi Saida Mirziyoyeva ham ishtirok etdi.
“Turon” maktab teatri tanlovi
Prezident Shavkat Mirziyoyevning 2024-yil 22-noyabrdagi tegishli qarori asosida tashkil etilayotgan “Turon” maktab teatri tanlovining tuman (shahar) bosqichi joriy yilning 24-28-fevral kunlari bo‘lib o‘tdi. Unda 45 288 ta jamoa (362 304 nafar o‘quvchi) ishtirok etdi. Tanlovning hududiy bosqichi esa 11-29-mart kunlari 208 ta jamoa (1 664 nafar o‘quvchi) o‘rtasida o‘tkazildi.
Joriy yil ikkinchi marotaba o‘tkazilayotgan “Turon” maktab teatri tanlovi bahslarida maktablarning 6-11 sinf o‘quvchilaridan (8 nafar) iborat jamoalar ishtirok etdi. Jamoalar ikkita — “Bizning maktab” tanishtiruv va savol-javob hamda “Teatr – ibratxona” sahna spektaklini namoyish etish shartlari asosida bellashishdi.
Bunda ishtirokchi jamoalar milliy va umuminsoniy qadriyatlar, urf-odat va anʼanalarimizga mos, tarbiyaviy ahamiyatga ega bo‘lgan asarlardan spektakl ko‘rinishida parchalar ijro etishdi.
Tanlov jarayonlari taniqli teatr aktyorlari, sohaning malakali mutaxassislaridan iborat hakamlar hayʼati tomonidan baholab borildi.
“Iqtidor” maktab ansambli tanlovi
“Iqtidor” maktab ansambli tanlovining tuman (shahar) bosqichi joriy yilning 7-11-aprel kunlari 8 890 ta jamoa (71 120 nafar o‘quvchi) o‘rtasida, hududiy bosqichi 14-29-aprel kunlari 208 ta jamoa (1 664 nafar o‘quvchi) o‘rtasida o‘tkazildi.
O‘quvchi-yoshlarning milliy cholg‘u sanʼatiga bo‘lgan qiziqishlarini oshirishga xizmat qiluvchi mazkur tanlovida 6-10 sinf o‘quvchilari (8 nafar)dan iborat jamoalar ishtirok etdi.
Jarayonlar O‘zbekiston Respublikasi xalq artisti va xizmat ko‘rsatgan artistlaridan iborat sanʼatkorlar tomonidan baholab borildi.
“Registon” maydonida jam bo‘lgan iqtidor egalari
17-iyun kuni Samarqand shahrida mazkur tanlovlarning Respublika bosqichi jarayonlari boshlandi.
Bunda har bir tanlov bo‘yicha hududlardan kelgan 14 ta jamoa (har bir hududdan 1 tadan) belgilangan shartlar asosida kuch sinashadi. Bahslar taniqli sanʼatkorlar va sohaning malakali mutaxassislari tomonidan baholanadi.
Shuningdek, ishtirokchi o‘quvchilar Samarqand shahridagi tarixiy va madaniy obidalarga sayohat qilishadi.
“Turon” maktab teatri tanlovi bahslari hududdagi Hamid Olimjon nomidagi viloyat musiqali drama teatrida, “Iqtidor” maktab ansambli tanlovi bahslari Nurafshon sanʼat saroyida tashkil etildi.
Tanlovlar g‘oliblarini tantanali taqdirlash marosimi “Boqiy shahar” majmuasida bo‘lib o‘tdi. Taqdirlash marosimida Prezident yordamchisi Saida Mirziyoyeva ham ishtirok etdi.
“Men uchun farzandlarimizning samimiy va beg‘ubor his-tuyg‘ularini hamda chaqnab turgan ko‘zlarini ko‘rishdan ko‘ra kuchliroq ilhomlantiruvchi narsa yo‘q.
Kecha Samarqand shahridagi “Boqiy shahar” majmuasida aynan shunday, ilhombaxsh kun bo‘ldi — respublikamizning iqtidorli yoshlariga bag‘ishlagan haqiqiy iste’dod bayrami tashkil etildi.
Har bir lahza o‘zgacha ma’no-mazmun kasb etdi. “Turon” teatr ko‘rik-tanlovi g‘oliblarining taqdirlanishi, “Iqtidor” tanlovi finalchilari — maktab ansambllarining yorqin chiqishlari yurtimizda naqadar ijodiy salohiyatli va umidli avlod yetishib chiqayotganini ko‘rsatdi.
Qobiliyatini, yuqori darajadagi mahoratini namoyon etgan barcha jamoalarni chin yurakdan tabriklayman!
Ushbu tadbir oldidan Maktabgacha ta’lim vazirligining hududiy boshqarmalari rahbarlariga xizmat avtomashinalari topshirildi”, deb yozdi Prezident yordamchisi.
Yakuniy natijalarga ko‘ra, g‘olib deb topilgan jamoa aʼzolari xorijiy davlatlar (“Turon” maktab teatri tanlovi g‘oliblari — Turkiyaga, “Iqtidor” maktab ansambli tanlovi g‘oliblari — Ozarbayjonga) taʼlim sayohatiga yuboriladi.
Shuningdek, tanlovlarda 2-3-o‘rinlarni qo‘lga kiritgan jamoalar tashkilotchilar tomonidan qimmatbaho sovg‘alar bilan taqdirlandi.
Tanlov g‘oliblari bilan ushbu havola orqali tanishish mumkin.
Izoh (0)