Ҳиндистон ва Канада 17 июнь куни икки давлат пойтахтларида комиссиялар ташкил этишга келишиб, муносабатларни қайта тиклаш ҳақида маълумот берди. Бу ҳақда CNN хабар берди.
Оттава ва Нью Деҳли икки йилдан бери кескин муносабатда эди. Бунга Оттава сикх айирмачиларининг ўлдирилишида Ҳиндистонни айблагани сабаб бўлган эди. Бу ҳақда Ҳиндистон бош вазири Нарендра Моди ва март ойида лавозимга киришган Марк Карни Канадада бўлиб ўтган G7 саммити доирасидаги учрашувдан сўнг маълум қилган.
“Ҳар икки мамлакат фуқаролар ва бизнесни ўйлаган ҳолда янги олий комиссарларни тайинлашга келишиб олдилар”, дейилади Карни идорасининг учрашувдан кейинги баёнотида.
Канаданинг собиқ бош вазири Жастин Трюдо ва Канаданинг бошқа расмийлари Нью Деҳлини 2023 йилда Ванкувер чеккасида таниқли сикх айирмачиси ва Канада фуқароси Хардип Сингх Нижжарнинг ўлдирилишига алоқадорликда очиқчасига айблаган эди.
Канада ҳукумати бу ҳодиса ҳақида Ҳиндистон ҳукуматига билдирганини айтганди. Бироқ Ҳиндистон ҳукумати расмийлари Канада далилларни тақдим этганини бир неча бор рад этиб, айбловларни “абсурд” деб атаган. Ҳодиса ортидан икки давлат ўртасидаги муносабатлар кескинлашиб кетган. Бу эса дипломатик алоқаларнинг узилиши ва виза хизматларининг вақтинча тўхтатилишига сабаб бўлган.
Моди Карни билан бўлган учрашувни қуйидагича тасвирлаган: “Ҳиндистон ва Канадани демократия, эркинлик ва қонун устуворлигига бўлган кучли ишонч боғлаб туради. Бош вазир Карни ва мен Ҳиндистон—Канада дўстлигига туртки бериш учун яқиндан ҳамкорлик қилишни интиқлик билан кутамиз”.
Карни бир қатор бошқа аъзо бўлмаган давлатлар — Бразилия, Жанубий Африка, Мексика, Украина, Австралия ва Жанубий Корея раҳбарларини ҳам бу йилги G7 саммитида иштирок этишга таклиф қилганди.
Изоҳ (0)