Макияжни ёқтирмайди, камерадан қўрқади ва ажримдан сўнг 2 қизни тарбияламоқда: Туба Буюкустуннинг кўп қиррали ҳаёти ҳақида

Туба Буюкустун — истеъдодли турк актрисаси, бахтли она ва талабгир турк сериали юлдузи. Кўплаб муваффақиятли ҳамкасбларидан фарқли ўлароқ, у болалигида ҳаётини кинематограф билан боғлашни хаёлига ҳам келтирмаган.

Хатиче Туба Буюкустун 1982 йил 5 июлда Истанбулда туғилган. У ёшлигиданоқ расм чизишга қизиқиб, санъатга меҳр қўйган. Ота-онаси унинг интилишларини қўллаб-қувватлашга қарор қилиб, уни Догуш хусусий мактабига ўқишга юборишган. Кейинчалик Туба Мимар Синан номидаги Тасвирий санъат университетининг саҳна безаклари ва либослар дизайни бўлимига ўқишга кирган.

Ўша пайтда Буюкустун актрисалик карьераси ҳақида орзу ҳам қилмаган. У биринчи марта тасодифан суратга олиш майдончасига тушиб қолган. “Кириш имтиҳонлари олдидан дугонам билан университет биносида адашиб қолгандик. Ўша куни у ерда каталог учун суратга олиш ишлари олиб борилаётган экан, улар мени кўриб қолишди, ёқиб қолибман ва суратга олишни хоҳлашди. Менда эса камерафобия бор. Фото ёки видеокамерани кўрсам, уяла бошлайман. Мен “Йўқ” дедим. Шуни айтишим билан юзимга пардоз қила бошлашди. 3-4 та сурат олишди, мен эса ҳамон “Йўқ” деяпман. Менинг моделлик ҳаётим ана шундай бошланган. Модель бўлиб ишлаганимда, сериалларда суратга тушиш таклифлари келар эди, лекин мен уларни қабул қилишдан қатъиян бош тортардим”, дея ҳикоя қилган у. Бироқ университетда ўқиётган пайтида Туба кинога қизиқишни бошлаган, аммо синовларга бориши ҳам шарт бўлмаган – ёрқин ташқи кўринишга эга гўзални режиссёрларнинг ўзлари ўз лойиҳаларига таклиф қилишган.

Ижодкорлик

Бироқ камералардан қўрқишига қарамай, Туба кинематографияда ўз кучини синаб кўришга қарор қилди. У 2003 йилда “Султон Маками” сериалида Несрин ролида илк бор суратга тушди. Кейин “Атиргулдан нақшлар” сериали ва “Гулизар” фильмида рол ижро этди. Аммо турк актрисасининг ўзи 2005 йилда премераси бўлиб ўтган “Отам ва ўғлим” фильмидаги иштирокини ўзининг ҳақиқий дебюти деб ҳисоблайди. “Охирги курсда Томрис Гиритлиоглу билан танишдим ва у менга Чаган Ирмакнинг ъОтам ва ўғлимъ фильмида рол таклиф қилди. Чаган Ирмакнинг ашаддий мухлиси бўлганим учун бу таклифни дарҳол қабул қилдим. Айнан шу воқеадан сўнг кинода карьера қилишга қарор қилдим”, дея фикр билдирди актриса.

Ўша йили Буюкустун “Липа соясида” сериалида Филиз ролини ижро этди ва икки йилдан сўнг унга “Осиё” кўп қисмли фильмида бош рол берилди.

Бу иш актрисага жаҳон шуҳратини келтирди. Турдизи юлдузининг кейинги фаолияти тез суръатда ривожланди. Туба “Юракларни синдирувчи”, “20 дақиқа”, “Ифлос пуллар ва муҳаббат”, “Жасур ва гўзал”, “Элчининг қизи”, “Менежеримга қўнғироқ қилинг”, “Усмонли империясининг юксалиши”, “Бошқа ҳаёт”, “Гўё эртаси йўқдек” ва бошқа кўплаб лойиҳаларда бош ролларни ижро этди.

Бугунги кунга келиб актрисанинг фильмографияси 25 дан ортиқ фильмни ўз ичига олади. Туба ўз фаолиятидаги лойиҳалар сони ортидан қувмаслигини очиқ тан олади. Турк юлдузи камера олдидаги қўрқувини бутунлай енга олмаган ва шу сабабли фақат сценарийнинг биринчи сатридан бошлаб уни чиндан ҳам қизиқтирган лойиҳалардагина суратга тушишга рози бўлади.

Шахсий ҳаёти

2011 йил ёзида Туба Буюкустун Онур Сайлак билан турмуш қурди ва 2012 йил январь ойида унга эгизак қизлар — Майа ва Топракни туҳфа этди. Оналик таътилида бўлган турк актрисаси ўз маҳоратини эслаб, қизалоқларига кийим тикиш билан шуғулланди.

2016 йил апрель ойида Туркия оммавий ахборот воситалари Туба ва Онурнинг ажралиши ҳақида кўплаб хабарлар тарқата бошлади. Машҳурларнинг ўзлари бир неча ой давомида бу миш-мишларни инкор этишди. Бироқ 2017 йил июнь ойида Сайлак ва Буюкустун ажрашди. Дастлаб эр-хотинга мулоқот қилиш қийин бўлди, аммо улар барибир келишувга эришди ва қизлари учун дўстона муносабатларни сақлаб қолди. Майа ва Топрак ота-оналари ажрашгандан кейин оналари билан яшашда давом этди, лекин улар оталарини ҳам тез-тез кўриб туришади.

Ажрашганидан бир неча ой ўтгач, Туба Умут Эвирген билан муносабат ўрнатди.

Турк ОАВ маълумотларига кўра, уларнинг севги муносабатлари тахминан уч йил давом этди, шундан сўнг улар ажралишди. 2020 йилда Буюкустуннинг Экин Мерт Даймаз билан учрашаётгани ҳақида миш-мишлар тарқалди. Бу миш-мишлар актрисани қаттиқ хафа қилди ва у уларни шахсан рад этиб, ижтимоий тармоқдаги саҳифасида тегишли пост эълон қилди.

Ҳозирги кунда турдизи юлдузи ўзининг шахсий ҳаётини умуман ошкор қилмасликка ҳаракат қилмоқда. Буюкустюн бу борада шундай дейди: “Шахсий ҳаётимиз билан томошабинлар хотирасида қанчалик кам қолсак, ижро этган ролларимиз билан шунчалик кўп эсда қоламиз”.

Туба Буюкустун ҳозир

Ҳозирда Туба кинода фаолиятини давом эттирмоқда, хусусан, у “Бошқа ҳаёт” сериалининг учинчи мавсуми учун тайёргарлик кўрмоқда. Бундан ташқари, у машҳур брендларнинг реклама кампанияларида суратга тушади ва хайрия ишларига алоҳида эътибор қаратади. Турк актрисаси уйсиз ҳайвонлар учун бошпаналарга фаол ёрдам кўрсатади ҳамда кўпинча ташлаб кетилган уй ҳайвонларини ўзи жойлаштиришга ҳаракат қилади.

Туба Буюкустун ишдан бўш вақтини оила даврасида ўтказишга интилади. У қизларига ва улар билан саёҳат қилишга кўп вақт ажратади. Турдизи юлдузи айнан фарзандлари унинг асосий ҳаётий мотиваторига айланганини ва у учун энг муҳими уларни муносиб инсонлар этиб тарбиялаш эканини бир неча бор таъкидлаган.