Мексикада Текстепек шаҳри мэри лавозимига номзод Лара Гутеррес жонли эфир вақтида отиб кетилди. Бу ҳақда CNN хабар берди.
Ҳодиса 12 май куни Веракруз штатида эфирга узатилган оммавий тадбир чоғида юз берган. Ҳужум Лара Гутеррес кўчада маҳаллий аҳоли билан саломлашиб кетаётган вақтда содир бўлган. Отишма оқибатида 5 киши ҳалок бўлган, яна 3 киши яраланган. Видеода 20 га яқин ўқ овозлари эшитилган.
Мексика президенти Клаудия Шейнбаум ҳужумни тасдиқлаган ва унинг сабаби ҳақида ҳали ҳеч қандай маълумотга эга эмаслигини айтган.
Штат губернатори Росио Нале Гарсияга кўра, қурбонлар орасида номзоднинг ўзи, Халтипан шаҳри полицияси ходими, унинг қизи, ташвиқот гуруҳи фаоли, шунингдек, шаҳар мэрлигига номзоднинг қўриқчиси бўлган.
Губернатор ҳалок бўлганларнинг оила аъзоларига ҳамдардлик билдирган ва тергов бошланганини маълум қилган. У шаҳар мэрлиги учун 1 июнга белгиланган сайловлар бўлиб ўтишини айтган.
Биз демократик жараёнлардан воз кечмаймиз. Ҳар бир муниципалитет ўз ҳокимият органларини танлаш ҳуқуқига эга. Қонун доирасида ҳаракат қиладиган ҳукуматмиз, деган Росио Нале Гарсия.
Мексикада сиёсатчиларга ҳужумлар
ОАВнинг қайд этишича, Мексикада сиёсатчиларнинг ўлдирилиши одатда наркокартеллар фаолияти билан боғланади. 2024 йили мамлакатда сиёсий-жиноий зўравонлик қурбонларининг рекорд сони қайд этилди. Ҳуқуқ ҳимоячилари 661 та ҳужум ҳақида хабар берди.
2024 йил октябрь ойида Мексиканинг Чилпансинго шаҳри мэри лавозимга тайинланганидан бир ҳафта ўтиб ўлдирилди. Ўлимидан бир неча соат олдин Алехандро Аркос бўрон туфайли ёмғирдан зарар кўрган Чилпансинго атрофидаги аҳоли пунктларига борганди. Йил бошидан буён Мексикада ўнлаб сайловолди кампанияси иштирокчилари ҳалок бўлди.
Изоҳ (0)