Meksikada Tekstepek shahri meri lavozimiga nomzod Lara Guterres jonli efir vaqtida otib ketildi. Bu haqda CNN xabar berdi.
Hodisa 12-may kuni Verakruz shtatida efirga uzatilgan ommaviy tadbir chog‘ida yuz bergan. Hujum Lara Guterres ko‘chada mahalliy aholi bilan salomlashib ketayotgan vaqtda sodir bo‘lgan. Otishma oqibatida 5 kishi halok bo‘lgan, yana 3 kishi yaralangan. Videoda 20 ga yaqin o‘q ovozlari eshitilgan.
Meksika prezidenti Klaudiya Sheynbaum hujumni tasdiqlagan va uning sababi haqida hali hech qanday ma’lumotga ega emasligini aytgan.
Shtat gubernatori Rosio Nale Garsiyaga ko‘ra, qurbonlar orasida nomzodning o‘zi, Xaltipan shahri politsiyasi xodimi, uning qizi, tashviqot guruhi faoli, shuningdek, shahar merligiga nomzodning qo‘riqchisi bo‘lgan.
Gubernator halok bo‘lganlarning oila a’zolariga hamdardlik bildirgan va tergov boshlanganini ma’lum qilgan. U shahar merligi uchun 1-iyunga belgilangan saylovlar bo‘lib o‘tishini aytgan.
Biz demokratik jarayonlardan voz kechmaymiz. Har bir munitsipalitet o‘z hokimiyat organlarini tanlash huquqiga ega. Qonun doirasida harakat qiladigan hukumatmiz, degan Rosio Nale Garsiya.
Meksikada siyosatchilarga hujumlar
OAVning qayd etishicha, Meksikada siyosatchilarning o‘ldirilishi odatda narkokartellar faoliyati bilan bog‘lanadi. 2024-yili mamlakatda siyosiy-jinoiy zo‘ravonlik qurbonlarining rekord soni qayd etildi. Huquq himoyachilari 661 ta hujum haqida xabar berdi.
2024-yil oktyabr oyida Meksikaning Chilpansingo shahri meri lavozimga tayinlanganidan bir hafta o‘tib o‘ldirildi. O‘limidan bir necha soat oldin Alexandro Arkos bo‘ron tufayli yomg‘irdan zarar ko‘rgan Chilpansingo atrofidagi aholi punktlariga borgandi. Yil boshidan buyon Meksikada o‘nlab saylovoldi kampaniyasi ishtirokchilari halok bo‘ldi.
Izoh (0)