Ироқ қамоқхона тизимидаги босимни юмшатиш мақсадида кенг қамровли амнистия қонунини имзолади. Қонун доирасида 19 мингдан ортиқ маҳбусни, жумладан, ИШИД аъзоси сифатида судланган маҳбусларни озод қилди. Бу ҳақда Al Jazeera хабар берди.
Январь ойида қабул қилинган амнистия тўғрисидаги қонунга кўра, қуролли гуруҳларга аъзоликда айбланган айрим маҳбуслар озодликка чиқиши, қайта судланиши ёки ишлари тугатилиши назарда тутилган. Бироқ “экстремизм” билан боғлиқ қотилликларда айбдор деб топилганлар бундан мустасно.
ИШИД 2014 йилда бутун мамлакат бўйлаб юриш қилишни бошлаган. Мосул, Тикрит ва Фалужа каби йирик шаҳарларни эгаллаб, Ироқ ҳудудининг деярли учдан бир қисмини назорат қилишга эришган. 2017 йилда эса мағлубиятга учраган эди.
Бу йилларда минглаб одамлар ҳалок бўлган, юз минглаб одамлар кўчишга мажбур бўлган. Язидий аҳолиси қириб ташланган ва катта ҳудудлар вайронага айлантирилган. Ироқ қўшинлари ИШИД назоратидаги ҳудудларни қайтариб олганида унинг кўплаб аъзолари ҳибсга олинган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)