Иқтисодиёт ва молия вазирлиги ҳамда Халқаро ислом савдо-молия корпорацияси (ITFC) ўртасидаги иқтисодий ҳамкорликни чуқурлаштириш мақсадида 100 миллион доллар миқдоридаги “Мурабаҳа” молиялаштириш битими ва агентлик келишуви имзоланди. Бу ҳақда вазирлик матбуот хизмати хабар берди.
Қайд этилишича, мазкур битим Иқтисодиёт ва молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси орқали республикада озиқ-овқат хавфсизлигини мустаҳкамлашга қаратилган.
Маблағлар 24 ойгача бўлган муддатга қулай шартларда икки траншда ажратилади. Ушбу маблағлар Ўзбекистон аҳолисининг эҳтиёжларини қондириш, мамлакат аграр секторининг барқарорлиги ва ривожланишини қўллаб-қувватлашга имкон беради.
Шу билан бирга, ITFC вакиллари билан келгусида бошқа соҳаларни ривожлантириш бўйича ҳамкорлик қилишга келишиб олинган.
Халқаро Ислом савдо-молия корпорацияси (ITFC) Ислом тараққиёт банкининг асосий институти бўлиб, унинг вазифаси Ислом ҳамкорлик ташкилотига аъзо давлатлар ўртасида иқтисодий ўсиш ва савдони ривожлантиришни рағбатлантиришдан иборат.
Эслатиб ўтамиз, ўтган йили сентябрь охирларида Осиё тараққиёт банки (ОТБ) Ўзбекистоннинг 2023 ва 2024 йил учун иқтисодий ўсиш прогнозини яхшилаганди. Ундан аввалроқ эса ОТБ Ўзбекистон энергия тақсимлаш тизимини рақамлаштиришга 200 млн доллар қарз ажратиши маълум бўлган эди.
Изоҳ (0)