Мюнхеннинг “Бавария” клуби “Байер” ҳамда Германия терма жамоаси ҳимоячиси Жонатан Танинг вакиллари билан музокараларни бошлади. Бу ҳақда таниқли журналист ва инсайдер Флориан Плеттенберг хабар берган.
Манбага кўра, ёзда эркин агентга айланиши кутилаётган футболчини қўлга киритиш учун мюнхенликлар спорт директорлари — Макс Эберл ва Кристофер Фройнд, шунингдек, жамоа бош мураббийи Венсан Компани фаол ҳаракат қилмоқда. Та “Бавария” ҳимоясини кучайтириш учун асосий номзод сифатида қайд этилмоқда.
Аввалроқ ОАВда Хаби Алонсо “Реал” бош мураббийлигига тайинланса, у Жонатанни ўз жамоасига олиб келмоқчи экани ҳақида хабарлар тарқалган эди.
Шунингдек, футболчининг вакиллари билан “Барселона” ҳам музокаралар олиб бораётгани айтилганди. Турли манбаларга кўра, каталонияликлар аллақачон Жонатан Та билан шахсий шартнома бўйича келишиб олган, бироқ молиявий чекловлар туфайли трансферни расмийлаштира олмаяпти.
Жорий мавсумда 28 ёшли ҳимоячи барча мусобақаларда 47 ўйинда майдонга тушиб, ўз ҳисобига 4 та гол ҳамда 1 та голли узатма ёздириб қўйган. Transfermarkt футболчининг қийматини 30 миллион еврога баҳолаган.
Изоҳ (0)