Нидерландия парламенти раиси ва ўта ўнг Озодлик партияси (PBB) аъзоси Мартин Босма Франция элчиси Франсуа Алабрюнга Бельгияни мамлакатлар ўртасида тақсимлашни таклиф этган. Бу ҳақда журналист Петра де Конинг NRC газетасидаги мақоласида ёзмоқда.
Унинг айтишича, таклиф Нидерландия парламентининг бошқа аъзолари иштирокидаги кечки овқат пайтида билдирилган. Конинг йиғилиш давомида раис Нидерландия Фландрияни қироллик таркибида кўришни хоҳлашини айтганини келтиради.
“Босманинг сўзларига кўра, Валлония Францияга ўтиши мумкин эди”, дея ёзади Конинг.
Bnnvara телеканали таъкидлашича, аксарият аҳоли нидерланд тилининг фламанд лаҳжасида сўзлашадиган Нидерландия ва Фландриянинг бирлашуви “Буюк Нидерландия” ғоясининг бир қисми ҳисобланади. Bnnvara изоҳига кўра, бу ғояни голландиялик ўнглар ва Бельгиянинг “Фламанд манфаати” партиясининг айрим вакиллари қўллаб-қувватлайди, ушбу партия узоқ йиллардан бери ҳудуднинг мустақиллиги учун курашиб келмоқда.
2021 йилда Бельгиянинг Антверпен шаҳри мэри Барт Де Вевер Фландрияни қиролликдан ажратиб, уни Нидерландияга қўшиб олиш орзуси ҳақида сўзлаган эди. Сиёсатчи янги кунни “ягона уйда — шимолий ва жанубий Нидерландияда” кутиб олиш орзусидан ҳеч қачон воз кечмаганини айтган. Мер жанубий Нидерландия деганда қироллик билан чегарадош бўлган Фландрияни назарда тутган.
Ҳозиргача Бельгия ушбу баёнотга ҳеч қандай муносабат билдирмаган.
Изоҳ (0)