Тошкент ва Наманган вилоятларида 3,4 млрд сўмлик энергия ресурсларидан ноқонуний фойдаланганлик ҳолатлари аниқланди, деб хабар бермоқда Департамент ахборот хизмати.
Унга кўра, ҳолатлардан бири Бош прокуратура ҳузуридаги департаментнинг Бўстонлиқ тумани бўлими томонидан ўтказилган терговга қадар текширувда аниқланган. Фуқаролар Д.А. ва У.Б. “Бештут” МФЙ ҳудудидаги дала ҳовлида тижорат мақсадида умумий фойдаланишдаги электр тармоғига тўғридан-тўғри уланиб, 2 млрд сўмлик электр энергиясидан ноқонуний фойдаланган.
Шунингдек, департаментнинг Янгиқўрғон тумани бўлими ва “Ўзэнергоинспекция”нинг Наманган вилояти ҳудудий бошқармаси ходимлари ҳамкорлигида ўтказилган тезкор тадбирда фуқаро Д.Х. “Юқори Қораянтоқ” МФЙ ҳудудидаги боғида умумий фойдаланишдаги газ тармоғига ўзбошимчалик билан тўғридан-тўғри уланиб, 1,4 млрд сўмлик табиий газдан ноқонуний фойдалангани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Бундай ҳолатлар сони ортиб бормоқда
Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди
- Қорақалпоғистоннинг учта ҳудудида 845 млн сўмлик газдан ноқонуний фойдаланилди
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
- Учта вилоятда қарийб ярим млрд сўмлик газдан ноқонуний фойдаланилди
Изоҳ (0)