O‘zbekistonda kam ta’minlangan oilalarga elektr va gaz to‘lovlarida kompensatsiya beriladi. Bu haqda “Yoqilg‘i-energetika sohasida bozor mehanizmlarini joriy etishda ehtiyojmand aholini davlat tomonidan qo‘llab-quvvatlashning qo‘shimcha chora-tadbirlari to‘g‘risida”gi prezident qarorida belgilandi.
Unga ko‘ra, 2025-yil 1-maydan 2027-yil 1-aprelga qadar “Ijtimoiy himoya yagona reyestri” axborot tizimi orqali bolalar nafaqasi va moddiy yordam oluvchi hamda Kambag‘al oilalar reyestriga kiritilgan, shuningdek, reyestrlarga kiritilmagan, biroq moddiy ahvoli bo‘yicha kam ta’minlangan oilalar mezonlariga to‘g‘ri keluvchi, oiladagi jon boshiga daromadi minimal iste’mol xarajatlarining 1,5 barobaridan oshmaydigan oilalarga:
- elektr energiyasi iste’moli bo‘yicha – oyiga bazaviy me’yordan 150 kVt soatgacha;
- tabiiy gaz iste’moli bo‘yicha – isitish mavsumida oyiga bazaviy me’yordan 250 kub metrgacha, boshqa davrlarda oyiga bazaviy me’yordan 150 kub metrgacha ortiq foydalanilgan qismi uchun bazaviy me’yor doirasidagi hamda bazaviy me’yordan oshgan narxlar o‘rtasidagi farq kompensatsiya qilib beriladi.
2025—2026-yilgi isitish mavsumida aholining ehtiyojmand qatlamini qo‘shimcha moddiy jihatdan qo‘llab-quvvatlash maqsadida 2025-yilning noyabr oyida quyidagi oilalarga 1 million so‘mdan bir martalik moddiy yordam ajratiladi:
- reyestrlarga kiritilgan oilalarga;
- “mahalla yettiligi” xulosasi asosida reyestrlarga kiritilmagan, biroq yordamga muhtoj oilalarga.
Ikkinchi holatda “mahalla yettiligi” tomonidan qo‘shimcha ro‘yxat shakllantirishda birinchi navbatda boquvchisini yo‘qotgan oilalar, a’zolari I yoki II guruh nogironi bo‘lgan shaxslardan iborat bo‘lgan oilalar, nogironligi bo‘lgan bolalarni parvarishlayotgan oilalar, uzoq muddatli davolanishni talab etadigan kasalliklar bilan kasallangan shaxslar yashovchi oilalar, o‘zgalar parvarishiga muhtoj bo‘lgan yolg‘iz yashovchi shaxslar hamda yolg‘iz yashovchi keksalar va nogironligi bo‘lgan shaxslar, uch va undan ortiq oila yashaydigan xonadonlarda hamda gaz ta’minoti bo‘lmagan va markazlashgan tartibda isitilmaydigan ko‘p qavatli uylarda yashovchi oilalar inobatga olinadi.
Qo‘shimcha ro‘yxat 1-oktyabrgacha shakllantiriladi. Bir martalik moddiy yordam noyabr oyida to‘lanadi.
Qo‘shimcha ravishda shakllantiriladigan ro‘yxatdagi oilalar soni reyestrga kiritilgan oilalar sonining 40 foizidan oshmasligi lozim.
O‘zbekiston mahallalari uyushmasi va Ijtimoiy himoya milliy agentligi aholiga moddiy yordam ajratishda mahalla raislari tomonidan shaffoflik va adolatlilik ta’minlanishini kafolatlashi va shaxsiy javobgarligini belgilashi lozim.
Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimliklari bir martalik yordamni to‘lash bo‘yicha qo‘shimcha ro‘yxatning to‘g‘ri shakllantirilishi hamda to‘lovlarning o‘z vaqtida amalga oshirilishiga shaxsan javobgar etib belgilandi.
Izoh (0)