Самарқанд вилоятида йўловчи ташиш фаолияти билан шуғулланувчи тадбиркорлик субъектлари томонидан ҳаракат таркибини янгилаган ҳолда йўловчиларга қулай ва хавфсиз хизмат кўрсатишни ташкил этиш масаласига алоҳида эътибор қаратилмоқда, деб хабар беради Транспорт вазирлиги матбуот хизмати.
Хусусан, “Дилшодтранссервис” МЧЖ томонидан Хитойнинг CRRC компаниясида ишлаб чиқарилган 10 та янги автобус олиб келинган.
Замонавий талаблар асосида жиҳозланган ушбу автобуслар Самарқанд шаҳар жамоат транспортининг янги йўналишлар тармоғида йўловчиларга хизмат кўрсатади. Корхона томонидан яна 20 та ушбу русумдаги автобуслар олиб келиниши режалаштирилган.
Президент Шавкат Мирзиёев ўзининг Олий Мажлис ва Ўзбекистон халқига йўллаган мурожаатномасида жамоат транспорти мутлақо ўзгариши ҳақида айтган эди. Шундан сўнг апрель ойида Тошкентга Хитойдан 268 та автобус ва электробуслар олиб келинди.
Май ойида Бухорога янги 100 та автобус ва микроавтобус, июль бошида Сирдарё вилоятига эса 160 та янги автобус олиб келиниши маълум бўлди. Аввалроқ “Тошшаҳартрансхизмат”га йўловчиларни ташишда кўриладиган зарарларни қоплаш учун 18 миллиард сўм ажратилгани, Тошкентдаги 32 та автобус йўналишида “кунлик план” бекор қилингани ҳақида хабар берилган эди.
Изоҳ (0)