“Кварц” компаниясининг устав капиталидаги 89,78 фоиз акциялар пакетини сотиш бўйича келишувга эришилди. Бу ҳақда Давлат активларини бошқариш агентлиги хабар бермоқда.
Маълум бўлишича, “Кварц” устав капиталидаги 89,78 фоиз акциялар пакети 265 млрд сўмга “Қувасойцемент” компаниясига сотиш бўйича келишувга эришилган.
Келишувга кўра, “Қувасойцемент” “Кварц”нинг 47,2 млн евролик кредит мажбуриятини тўлиқ қоплайди.
“Кварц” компаниясини хусусийлаштириш жараёнида инвесторлардан сотиб олиш бўйича 3 та талабгорлардан ариза келиб тушган. Энг яхши таклиф сифатида “Қувасойцемент” томонидан тақдим этилган таклиф баҳоланган.
Давактив агентлиги “Қувасойцемент” келажакда бозордаги рақобат кучайган шароитда “Кварц“ компанияси фаолиятини ривожланишини таъминлашига ишонади.
“Қувасойцемент” — юқори сифатли минерал қўшимчали портландцемент, таркибида гипс ва оҳакли бирлаштирувчи аралашмалар, қовурғали асбест цемент листлар, керамик черепицаларни ишлаб чиқарувчи компания ҳисобланади.
Компания Ўзбекистон ва Марказий Осиё минтақаси бозорига қурилиш материалларининг етакчи ва йирик етказиб берувчиларидан биридир.
Изоҳ (0)