Халқаро олимпия қўмитасининг Грециянинг Коста-Наварино шаҳрида ўтказилаётган 144-сессиясида етти нафар номзод орасидан яширин овоз бериш йўли билан Зимбабвелик 41 ёшли Кирсти Ковентри саккиз йиллик муддатга сайланди. Бу ҳақда қўмита хабар бермоқда.
Кирсти Ковентри 2013 йилда сайланган ва 2021 йилда қайта сайланган Томас Бахнинг ўрнини эгаллайди. У 97 та овоздан 49 тасини олган. Янги сайланган президент Ковентри ХОҚ президенти лавозимини эгаллаган биринчи аёл ва Африканинг биринчи вакили бўлди.
Сайланган президент 2025 йил 23 июнда амалдаги рахбар Бах томонидан ваколатлар топширилгандан сўнг лавозимга киришади. Шу пайтгача ўз лавозимида қоладиган президент ваколатларини топширгач, ХОҚ аъзоси ваколатларини ҳам зиммасидан соқит қилади ва фахрий президент лавозимини эгаллайди.
“Бу ғоят ғаройиб лаҳза. Тўққиз ёшли қизалоқ бўлганимда, бир кун келиб бу ерда туриб, бу ажойиб ҳаракатга ҳурмат бажо келтиришимни ҳеч ўйламагандим”.
Бу нафақат улкан шараф, балки ҳар бирингиз олдида ушбу ташкилотга ғурур ва қадриятлар асосида раҳбарлик қилиш мажбуриятимни ҳам эслатиб туради. Мен шундай қиламанки, барчангиз бугун қабул қилган қарорингиздан жуда-жуда фахрланасиз ва умид қиламанки, ишонч билдирасиз. Олдинда бизни ҳамкорликдаги ишлар кутмоқда. Бу сайлов кураши ғоят ажойиб бўлди”, деди сайланган президент Ковентри сессия иштирокчиларига.
Ковентри Милан ва Кортинада ўтказиладиган 2026 йилги қишки Олимпия ўйинларини ўзининг биринчи Олимпиадаси сифатида назорат қилади.
ХОҚ янги президентининг таржимайи ҳоли
Ковентри ҳозирда ХОҚ аъзоси ва 2018 йилдан буён Зимбабве спорт, санъат ва дам олиш вазири ҳисобланади. Бундан ташқари, у 2017-2024 йилларда Халқаро сёрфинг федерацияси вице-президенти лавозимини эгаллаган. Собиқ сузувчи биринчи марта 2013 йилда ХОҚ спортчилар комиссияси аъзоси сифатида ХОҚ аъзоси этиб сайланган ва 2021 йилда аъзоси этиб сайлангунига қадар ушбу лавозимда ишлаган.
Ковентри бешта Олимпия ўйинларида иштирок этган. Сидней—2000даги дебютидан Рио—2016даги сўнгги чиқишигача у еттита Олимпия медалини (иккита олтин, тўртта кумуш, битта бронза) қўлга киритган. 2004 йилда Афина ва 2008 йилда Пекинда ўтказилган Олимпия ўйинларида 200 метрга чалқанча сузиш бўйича олтин медал соҳиби.
Изоҳ (0)