Президент Шавкат Мирзиёев раислигида 29 ноябрь куни бўлиб ўтган қишлоқ хўжалигида сув ресурсларидан оқилона фойдаланиш ва йўқотишларни камайтириш чора-тадбирлари тўғрисидаги видеоселекторда Ўзбекистондаги сув хўжалигида “каналларни бетонлаш бўйича зарбдор йил” эълон қилинган эди. Йиғилишда давлат раҳбари вилоят ва туман ҳокимларига бир йил ичида 3 минг 500 километр ички тармоқларни бетон қопламага ўтказиш бўйича топшириқ берди. Қарши тумани ҳокими Зоир Алиқулов президент топшириғи ижросини таъминлашга киришди.
Туман ҳокимлиги ахборот хизмати раҳбари Тўлқин Турдиевнинг “Дарё”га билдиришича, кеча, 1 декабрь куни туманда сув хўжалиги каналларини бетонлаш ишлари бошлаб юборилган.
Давлатимиз раҳбари қишлоқ хўжалигида сув ресурсларидан оқилона фойдаланиш ва йўқотишларни камайтириш масалаларига тўхталиб, бир йил давомида сувни тежаш бўйича фавқулодда иш тизимига ўтилишини таъкидлаганди. Бунда биринчи муҳим вазифа – канал ва ариқларни бетонлаш ишлари этиб белгиланди. Ушбу ташаббус туманда кўтаринкилик билан қарши олинди. 1 декабрдан бошлаб туманимизда каналларни бетонлаш ишларига жиддий киришилди. Эрта тонгдан юздан ортиқ техника ва мингга яқин ҳашарчилар жалб этилиб, катта ҳашар ишлари бошлаб юборилди. Ишлар аввалида туман ҳокими бошчилигидаги раҳбарлар нуронийлардан маслаҳат олиб, бошлаган ишлари хайрли бўлишини тилашди. Дуолар қилиниб, жонлиқ сўйилди, — дейди Тўлқин Турдиев.
Масъулнинг билдиришича, ҳашарда 100 дан ортиқ турли техника қатнашган.
Вилоятимиз Ўзбекистон бўйича кўп сув истеъмол қиладиган ҳудудлардан бири. Сувнинг етиб келиши ҳам осон эмас, еттита насос станцияси орқали Амударё суви 130 км баландликка кўтариб берилади. Шундай бўлса-да, сувга бўлган эътиборсизлик натижасида каналларни лойқа босиши ва филтарацияни кўпайиб кетиши юзага келиб, олтинга тенг бўлган сув кўп миқдорда йўқотилаётганди. Ҳозир вақтида буни олди олинаётгани глобал исиш ва бошқа турли сабаблар фонида катта аҳамият касб этмоқда. Президентимизнинг ушбу оқилона топшириғи ижросини амалга ошириш мақсадида бугун Қарши туманида туман ҳокимлиги бошчилигида катта ҳашар ўтказилаётганлигидан мамнунман. Каналларимизда сув режими ўзгариб кетган, ҳашар йўллари билан бетонлаштириш ишларини амалга ошириш жудаям қулай, — дейди Қарши муҳандислик иқтисодиёт институти “Гидравлика ва гидро иншоотлар” кафедраси катта ўқитувчиси Истам Саидов.
Туман ҳокими Зоир Алиқуловнинг “Дарё” журналистига маълумот беришича, жорий йилда тумандаги 23,7 километр ариқ ва каналларни бетонлаштириш ишлари олиб борилади.
Йил давомида тумандаги 23,7 километр узунликдаги ариқ ва каналларни бетонлаштириш ишлари олиб борилади. Кейинги йилларда ҳам канал ва ариқларни бетонлаштириш ишлари жадал олиб борилиб, туманимизда самарасиз исроф бўлаётган сувдан оқилона фойдаланиш эвазига 50 минг 400 гектар ер майдонларида сув таъминоти яхшиланади, — дейди туман ҳокими.
Ҳокимлик масъули Тўлқин Турдиевнинг қўшимча қилишича, мингга яқин ҳашарчилар иштирок этган каналларни бетонлаштириш ишларида туман ҳокими Зоир Алиқулов ишчиларга ўрнак кўрсатиб, канал ҳам қазиган.
Изоҳ (0)