Сурхондарё вилоятининг Сариосиё туманида салкам 5 мингта хонадонни электр токи билан таъминловчи кичик ГЭС фойдаланишга топширилди. Бу ҳақда “Дарё”га ташкилот ахборот хизмати раҳбари Равшан Бойқулов хабар берди.
![](/static/2024/08/30/IMG_2055-Zd6e6CyI.jpg)
Бугун давлат мустақиллигининг ўттиз уч йиллигига муносиб совға сифатида Тўполанг дарёсида янгидан барпо этилган Зарчоб-1А кичик ГЭСнинг очилиш маросимига бағишланган тадбир бўлиб ўтди. Тадбирда “Ўзбекгидроэнерго” раҳбарияти, вилоят ва шаҳар ҳокимлиги мутасаддилари, ҳудудий тизим корхоналари вакиллари, соҳа мутахассислари ҳамда ОАВ вакиллари иштирок этди, дейди Равшан Бойқулов.
![](/static/2024/08/30/IMG_2052-Wcfl6iES.jpg)
Билдирилишича, қуввати 3 МВтга тенг, йилига ўртача 13,3 миллион кВт/соат электр энергия ишлаб чиқарувчи Зарчоб-1А кичик ГЭСи ҳудуддаги 4750 та хонадонни электр токи билан таъминлайди.
Ушбу кичик ГЭСни ишга тушириш орқали Тўполанг дарёси сувдан оқилона фойдаланган ҳолда тўртинчи марта дарё суви гидроагрегатлар орқали ўтказилиб электр энергия ишлаб чиқарилади. “Ўзбекгидроэнерго” томонидан қуриб битказилган мазкур кичик ГЭС Ўзбекистон республикаси президентининг 2024 йил 12 июлдаги “Гидроэнергетика соҳасини ислоҳ қилиш чора-тадбирларини жадаллаштириш тўғрисида”ги қарори ижросини таъминлаш ҳисобланади, дейди масъул.
![](/static/2024/08/30/IMG_2067-0QgpHHAG.jpg)
Лойиҳа қиймати 3,33 миллион доллар бўлган ГЭСни ишга тушириш орқали 5 та янги иш ўрни яратилган. ГЭСни қуриш ишлари “Гидро техник” МЧЖ томонидан бажарилган. ГЭСда Френсис туридаги вертикал 1 та гидроагрегат ўрнатилган.
Изоҳ (0)