Адлия вазирлиги шахсларнинг тасвирга бўлган ҳуқуқлари ҳимоясини кучайтириш мақсадида айрим қонунларга ўзгартириш киритишни назарда тутувчи лойиҳани жамоатчилик муҳокамаси учун эълон қилди.
Лойиҳада қайд этилишича, шахсларнинг тасвиридан фойдаланиш билан боғлиқ муносабатларда шахсий дахлсизлик ҳуқуқи уни амалга ошириш механизмлари билан таъминланмагани сабабли чекланмоқда. Таклиф этилаётган қонунда шахсларнинг тасвирга бўлган ҳуқуқлари муҳофазасини кучайтириш мақсадида Фуқаролик, Меҳнат ва Маъмурий жавобгарлик тўғрисидаги кодексларга айрим ўзгартиш ва қўшимчалар киритиш таклиф қилинмоқда.
Жумладан, Фурқаролик кодексини 100-1-модда (тасвирга бўлган ҳуқуқларни ҳимоя қилиш) билан тўлдирилади. Унга кўра, шахсни тасвирга (фототасвир, видеоёзув, у акс этган тасвирий санат объекти ёки уни идентификация қилиш имконини берадиган бошқа ташқи белгилар йиғиндиси) олиш ва ундан фойдаланишга фақат ушбу шахснинг розилиги билан йўл қўйилади. 16 ёшга тўлмаганлар номидан розилик уларнинг ота-онаси (ота-онанинг ўрнини босувчи шахслар) томонидан берилади.
Қуйидаги ҳолларда розилик олиш талаб этилмайди:
- тўй ёки бошқа оммавий тадбирларда умумий жараённи тасвирга олишга;
- ноқонуний ҳаракатларни тасвирга олишга;
- хизмат вазифасини бажараётган давлат хизматчиларини тасвирга олишга;
- тасвир шахс томонидан ҳамма фойдалана оладиган қилинган бўлса;
- тасвирдаги шахсга нисбатан қонунчиликда белгиланган тартибда қидирув эълон қилишда;
- шахснинг ҳақ эвазига туширилган тасвиридан ушбу тасвирни олишдан кўзланган мақсадда фойдаланилганда;
- хавфсизликни таъминлаш мақсадида видеокузатув тизимлари орқали шахсларни тасвирга олишга (огоҳлантирувчи белгилар ўрнатилиши шарт).
Шахсларнинг қисман ёки тўлиқ кийимсиз бўлишини тақозо этадиган жойларда видеокузатув камераларини ўрнатиш ва шахсларни тасвирга олиш тақиқланади.
Ушбу моддада назарда тутилган талабларга риоя этилмаган ҳолларда, шахс тасвирдан фойдаланишни тўхтатишни, уни йўқ қилишни ҳамда етказилган моддий ва маънавий зарарни қоплашни талаб қилиш ҳуқуқига эга.
Лойиҳада, шунингдек Маъмурий жавобгарлик тўғрисидаги кодекснинг 46−1-моддасини (шахсий ҳаёт дахлсизлигини бузиш) қуйидаги иккинчи қисм билан тўлдирилиши назарда тутилмоқда: “Ушбу модданинг биринчи қисмида назарда тутилган ҳуқуқбузарликларни содир этиш учун ахборотни ноошкора олишга мўлжалланган техника воситаларидан фойдаланиш, — ҳуқуқбузарлик ашёларини мусодара қилиб, БҲМнинг 10 бараваридан 40 бараваригача миқдорда (3 миллион 750 минг сўмдан 15 миллион сўмгача) жарима солишга сабаб бўлади”.
Қонун лойиҳаси муҳокамаси 28 мартгача давом этади.
Ўзбекистонда фуқаронинг расмидан унинг розилигисиз фойдаланишни тақиқлаш 2020 йилда ҳам таклиф этилганди.
Изоҳ (0)