Adliya vazirligi shaxslarning tasvirga bo‘lgan huquqlari himoyasini kuchaytirish maqsadida ayrim qonunlarga o‘zgartirish kiritishni nazarda tutuvchi loyihani jamoatchilik muhokamasi uchun e’lon qildi.
Loyihada qayd etilishicha, shaxslarning tasviridan foydalanish bilan bog‘liq munosabatlarda shaxsiy daxlsizlik huquqi uni amalga oshirish mexanizmlari bilan ta’minlanmagani sababli cheklanmoqda. Taklif etilayotgan qonunda shaxslarning tasvirga bo‘lgan huquqlari muhofazasini kuchaytirish maqsadida Fuqarolik, Mehnat va Ma’muriy javobgarlik to‘g‘risidagi kodekslarga ayrim o‘zgartish va qo‘shimchalar kiritish taklif qilinmoqda.
Jumladan, Furqarolik kodeksini 100-1-modda (tasvirga bo‘lgan huquqlarni himoya qilish) bilan to‘ldiriladi. Unga ko‘ra, shaxsni tasvirga (fototasvir, videoyozuv, u aks etgan tasviriy sanat obyekti yoki uni identifikatsiya qilish imkonini beradigan boshqa tashqi belgilar yig‘indisi) olish va undan foydalanishga faqat ushbu shaxsning roziligi bilan yo‘l qo‘yiladi. 16 yoshga to‘lmaganlar nomidan rozilik ularning ota-onasi (ota-onaning o‘rnini bosuvchi shaxslar) tomonidan beriladi.
Quyidagi hollarda rozilik olish talab etilmaydi:
- to‘y yoki boshqa ommaviy tadbirlarda umumiy jarayonni tasvirga olishga;
- noqonuniy harakatlarni tasvirga olishga;
- xizmat vazifasini bajarayotgan davlat xizmatchilarini tasvirga olishga;
- tasvir shaxs tomonidan hamma foydalana oladigan qilingan bo‘lsa;
- tasvirdagi shaxsga nisbatan qonunchilikda belgilangan tartibda qidiruv e’lon qilishda;
- shaxsning haq evaziga tushirilgan tasviridan ushbu tasvirni olishdan ko‘zlangan maqsadda foydalanilganda;
- xavfsizlikni ta’minlash maqsadida videokuzatuv tizimlari orqali shaxslarni tasvirga olishga (ogohlantiruvchi belgilar o‘rnatilishi shart).
Shaxslarning qisman yoki to‘liq kiyimsiz bo‘lishini taqozo etadigan joylarda videokuzatuv kameralarini o‘rnatish va shaxslarni tasvirga olish taqiqlanadi.
Ushbu moddada nazarda tutilgan talablarga rioya etilmagan hollarda, shaxs tasvirdan foydalanishni to‘xtatishni, uni yo‘q qilishni hamda yetkazilgan moddiy va ma’naviy zararni qoplashni talab qilish huquqiga ega.
Loyihada, shuningdek Ma’muriy javobgarlik to‘g‘risidagi kodeksning 46−1-moddasini (shaxsiy hayot daxlsizligini buzish) quyidagi ikkinchi qism bilan to‘ldirilishi nazarda tutilmoqda: “Ushbu moddaning birinchi qismida nazarda tutilgan huquqbuzarliklarni sodir etish uchun axborotni nooshkora olishga mo‘ljallangan texnika vositalaridan foydalanish, — huquqbuzarlik ashyolarini musodara qilib, BHMning 10 baravaridan 40 baravarigacha miqdorda (3 million 750 ming so‘mdan 15 million so‘mgacha) jarima solishga sabab bo‘ladi”.
Qonun loyihasi muhokamasi 28-martgacha davom etadi.
O‘zbekistonda fuqaroning rasmidan uning roziligisiz foydalanishni taqiqlash 2020-yilda ham taklif etilgandi.
Izoh (0)