Ҳиндистонда 36 соат давомида Ҳимолай тоғларидаги қор кўчкиси остида қолиб кетган ишчилар металл контейнерлардан тирик ҳолда олиб чиқилди. Бу ҳақда CNN хабар берди.
Уттаракҳанд штати Мана қишлоғида 28 февраль куни денгиз сатҳидан тахминан 10500 фут (3200 метр) баландликда кучли қор кўчиши бошланган. Ҳиндистон армияси ушбу ҳудудда кенг миқёсида қутқарув операциясини бошлаган. Контейнерлар ичида 46 га яқин ишчи тирик қолгани аниқланган, саккиз ишчи ҳалок бўлган.
Қутқарилганларнинг аксарияти узоқ ҳудудда яшовчи, автомобиль йўли қурилишига жалб қилинган меҳнат муҳожирларидир.
Ишчилар одатда чодир тикиб яшашади, бироқ ноқулай об-ҳаво туфайли саккизта металл контейнерда вақтинчалик кун кечиришган. Бу эса кўплаб ишчиларнинг тирик қолишига сабаб бўлган.
Контейнерлар кўчки пайти одамлар хавфсизлигини максимал даражада таъминлаган ва энг муҳими, қутқарув ишларини осонлаштирган. Чунки қор остида кўмилган жасадни топиш катта контейнерни топишдан кўра қийинроқ.
Ҳимолойда бу каби қор кўчкилари асосан қишда тез-тез рўй беради. Аммо яқин йиллардаги глобал ҳаво исиши туфайли бу жараён узвийлиги аввалгиларга қараганда анча жадаллашган. Хусусан, 2010 йилда Ҳимолойдаги музликлар олдинги ўн йиллик билан солиштирганда 65 фоизга тезроқ эриган. Музлик ёнбағирларининг эрозияси, шунингдек, тошқинлар ҳам кўчкилар эҳтимолини оширади. Бу тоғли ҳудудларда яшовчи миллионлаб одамлар ҳаётини хавф остига қўяди.
2021 йилда Уттаракҳандда музликнинг бир қисми қулаши оқибатида 200 дан ортиқ одам ҳалок бўлган эди.
Изоҳ (0)