“Пахтакор” клуби бош мураббийи Педру Морейра ва футболчиси Брайан Риаскос Элит Чемпионлар Лигаси доирасида “Ал Садд” (2:1)га қарши ўйиндан сўнг матбуот анжуманида иштирок этди.
Морейра жамоа жуда яхши ўйин кўрсатганини айтди.
“Биринчи бўлимда тўлиқ устунликка эга бўлдик. Кўпроқ гол уришга интилдик. Ўтказиб юборган голимиз кичик хато сабабли юзага келди. Йигитлар кўрсатмаларни тўғри бажарган тақдирда ижобий натижаларга эриша оламиз. Навбатдаги баҳсларга янада яхши тайёрланамиз.
Хорижлик футболчиларни ўзим танладим. Улар жамоани кучайтиришига ишонганман. Ҳар ўйинда турли режаларга эгамиз ва футболчилар таркиб учун кураш олиб боришади. Бу ерда ўйнаб кетиш оддий эмас. Жамоавий бирга ўйнаб, ютуқларга эришамиз. Гол ўтказгач ҳам режамиздан чекинмадик. Доим шундай ўйнашни хоҳлаймиз.
Ким қандай ўйнаётганини таҳлил қилиб тураман ва шунга яраша ўзгаришларни амалга ошираман. Баҳс боришига қараб, кимни алмаштириш ёки ўйинга қўшиш борасида қарор чиқараман. Рақибни тўпсиз қолдиришга уриндик, улар тўп билан жуда хавфли жамоа. Мухлислар эса шубҳасиз бизнинг ўн иккинчи ўйинчиларимиз!”, – дейди мутахассис.
Риаскос ҳам мураббийнинг фикрларини тасдиқлаб, чиройли футбол намойиш қилинганини айтди.
“Машғулотларда ишладик ва бу самарасини берди. Икки тўп киритганимдан хурсандман. Жамоадошларимга раҳмат айтаман ва ғалаба билан табриклайман. Мухлисларни кўпроқ хурсанд қилишга интиламиз.
Имкон қадар кўпроқ гол билан жамоага ёрдам беришга ҳаракат қиламан. Нечта гол уришимни ҳозир айта олмайман. Бор кучимни жамоа манфаати учун сарфлайман”, – дейди футболчи.
Изоҳ (0)