Бош прокуратура Тошкент шаҳар Шайхонтоҳур туманида ҳоким ёрдамчиси фуқароларнинг 635 миллион сўмини ўзлаштиргани ҳақида хабар берганди. Тошкент шаҳар ҳокимлиги пойтахтда бундай тавсифга мос келадиган мансабдор шахс йўқлигини билдиргач, Бош прокуратура яна расмий ахборот билан чиқди. Ўзи нима гап?
Жиноят ҳақида Бош прокуратура хабари
Унда Шайхонтоҳур туманида фаолият юритган ҳоким ёрдамчиси М.Ф. 20 нафар фуқароларга электрон тарзда берган тавсияномаларига асосан, қабул қилиб олган электрон калитлардан фойдаланган ҳолда жами 427,7 миллион сўмлик кредит маблағларини қўлга киритиб, оилавий тадбиркорликни ривожлантириш, жумладан эҳтиёжманд оила аъзоларининг ҳунармандчилик, касаначилик, томорқадан самарали фойдаланиш, кичик ишлаб чиқариш, хизмат кўрсатиш ва бошқа турдаги фаолияти йўлга қўйилишини ташкиллаштирмасдан, ўз эҳтиёжларига сарфлаб юборгани келтирилган.
Шунингдек, М.Ф. ўзининг қариндошлари ва бошқа 5 нафар фуқароларга маҳалла ҳудудида яшамаган бўлсада, қалбаки тавсияномалар орқали жами 207,7 миллион сўм миқдоридаги кредит маблағлари ажратилишига эришиб, ўзлаштириш йўли билан талон-торож қилгани, ҳолат юзасидан жиноят иши қўзғатилгани маълум қилинган.
Ҳокимлик муносабати
Шайхонтоҳур тумани ҳокимлиги тумандаги маҳаллаларнинг бирида ҳоким ёрдамчиси бўлиб фаолият юритган М.Ф. 2024 йил 29 ноябрь куни ўз аризасига кўра лавозимидан озод этилганини маълум қилди. Пойтахт ҳокимлиги ҳам буни тасдиқлаб, оммавий ахборот воситаларидан ахборотни эълон қилишда ишончлилик, холислик ва масъулият тамойилларига амал қилишга чақирди.
Бош прокуратура жавоби
Идора берган ахборотга кўра, М.Ф. 2022 йил 7 октябрдан 2024 йилнинг 29 ноябрига қадар Шайхонтоҳур тумани “Камолон Дарвоза” маҳалла фуқаролар йиғинининг маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчиси лавозимида фаолият юритиб, туман ҳокимининг 2024 йил 14 декабрдаги тегишли қарори билан эгаллаб турган лавозимидан озод қилинган.
М.Ф. айнан ҳоким ёрдамчиси лавозимида фаолият юритган даврида муқаддам эълон қилинган хабардаги қилмишларни содир этган.
Бош прокуратура матбуот хизмати ахборот ҳаққоний ва холис бўлиши зарур, дея қайд этди ва жиноят бўйича эълон қилинган баёнотларни жамоатчиликни чалғитишга қаратилган дея баҳолади.
Изоҳ (0)