O‘zbekistonda tadqiqotlarni qo‘llab-quvvatlash jamg‘armasi tashkil etiladi, deb xabar bermoqda Adliya vazirligi.
Unga ko‘ra, “Tahliliy va tadqiqotchilik faoliyatini tashkil qilish bo‘yicha qo‘shimcha chora-tadbirlar to‘g‘risida”gi prezident qarori qabul qilindi. Qaror bilan Tahliliy va tadqiqot tuzilmalari faoliyatini tashkil qilish bo‘yicha muvofiqlashtiruvchi kengash huzurida Tadqiqotlarni qo‘llab-quvvatlash jamg‘armasi tashkil etilishi belgilandi.
Jamg‘arma mablag‘lari Tiklanish va taraqqiyot jamg‘armasida alohida ochilgan hisobraqamlarda jamlanadi va Muvofiqlashtiruvchi kengash tomonidan belgilangan tartibda sarflanadi. Jamg‘arma mablag‘lari quyidagilarga yo‘naltiriladi, jumladan:
- muvofiqlashtiruvchi kengashning faoliyat yo‘nalishlari bo‘yicha tadqiqotlarni amalga oshirish;
- tahliliy materiallarni tayyorlash va tadqiqotlarni o‘tkazish uchun grantlar ajratish;
- ijtimoiy so‘rovlar va jamoatchilik fikrini o‘rganish bo‘yicha tadqiqotlarni amalga oshirish.
Darvoqe, jamg‘arma mablag‘lari maqsadli va samarali sarflanishi ustidan nazorat Muvofiqlashtiruvchi kengash tomonidan amalga oshiriladi. Muvofiqlashtiruvchi kengashga quyidagilarga ruxsat beriladi:
- Jamg‘arma mablag‘larini milliy va xorijiy valyutalarda bank depozitlariga joylashtirish;
- grantlar va beg‘araz texnik ko‘mak vositalarini jalb qilish;
- jismoniy va yuridik shaxslarga to‘lov asosida tadqiqotlar natijalari va ma’lumotlar bazalaridan foydalanish hamda tadbirlarda ishtirok etish imkoniyatlarini berish.
Yangi tashkil etilgan jamg‘armalar
Bundan avval O‘zbekistonda Yashil xayriya jamg‘armasi tashkil etilishi haqida xabar berilgandi. Bunda “Yashil olam” elektron platformasi orqali amalga oshirilgan xayriya to‘lovlari Yashil xayriya jamg‘armasining alohida hisobvarag‘iga yo‘naltiriladi.
Shuningdek, O‘zbekiston milliy investitsiya jamg‘armasi tashkil etilishi ham aytilgandi. Jamg‘armaning 2030-yilgacha investitsiya aktivlari sof foydasining kamida 50 foizi tegishli yil yakunlariga ko‘ra dividendlar to‘lashga yo‘naltiriladi.
Shu bilan birgalikda, O‘zbekiston mahallalari uyushmasi huzurida Mahallalar faoliyatini rag‘batlantirish jamg‘armasi tashkil etilishi xabar qilingan.
Izoh (0)