Вазирлар Маҳкамасининг 30 ноябрдаги қарори билан “Яшил макон” умуммиллий лойиҳаси доирасида амалга ошириладиган тадбирларни қўллаб-қувватлаш чоралари белгиланди.
Унга кўра, президентнинг 2023 йил ноябрь ойидаги фармонига мувофиқ 2025 йил 1 мартдан бошлаб жисмоний ва юридик шахслар томонидан ихтиёрий равишда “Яшил тўлов” хайрия тўловларини “Яшил олам” ва “Яшил тўлов” платформалари орқали амалга ошириш имконияти яратилади.
Экология, атроф-муҳитни муҳофаза қилиш ва иқлим ўзгариши вазирлиги ҳузурида юридик шахс ташкил этмаган ҳолда, Яшил тўлов платформаси орқали республикада дарахт ва бута кўчатларини экишга аҳолини кенг жалб қилиш бўйича Яшил хайрия жамғармаси ташкил этилади.
Жисмоний ва юридик шахслар томонидан амалга оширилган “Яшил тўлов” хайрия тўловлари Яшил хайрия жамғармасида жамланади. Бунда “Яшил олам” электрон платформаси орқали амалга оширилган хайрия тўловлари Яшил хайрия жамғармасининг алоҳида ҳисобварағига йўналтирилади.
Жамғарма маблағлари қуйидагиларни молиялаштиришга йўналтирилади:
- дарахт ва буталар экиш учун ажратилган ер участкаларини тайёрлаш;
- дарахт ва буталар экиш бўйича лойиҳа-смета ҳужжатларини ишлаб чиқиш;
- дарахт ва буталар экилган участкаларда суғориш тизимларини ўрнатиш;
- дарахт, бута ва қаламчаларни харид қилиш;
- ҳудудни ободонлаштириш, дендрарийлар, “яшил боғлар”, “яшил жамоат боғлари”, “яшил қалқон” ва “яшил камар” барпо этиш ишлари;
- экилган кўчатларни уч йил давомида сақлаш ишлари;
- йирик ўлчамли дарахт ва буталарни етиштириш ҳамда етказиб бериш.
Яшил хайрия жамғармасига келиб тушган маблағлар очиқлик ва жамоатчиликка ҳисобдорлик тамойиллари асосида фойдаланилади.
2025 йил 1 июнга қадар Миллий яшил фаровонлик фондининг электрон маълумотлар базаси шакллантирилади ва Давлат ўрмон фондига кирувчи дарахт ва буталар тўғрисидаги маълумотларни ўз ичига олган ўсимлик дунёси объектларининг давлат кадастри юритилади.
“Яшил макон” умуммиллий лойиҳаси ҳақида
Ўзбекистонда ушбу умуммиллий лойиҳа уч йил аввал бошланди. Қўшни мамлакатлар билан биргаликда Минтақавий иқлим стратегиясини амалга оширишга киришилди. Тошкентда Марказий Осиё атроф-муҳит ва иқлим ўзгаришларини ўрганиш университети ташкил этилди.
“Яшил макон” дастури учун 2025 йилда 100 миллиард сўм ажратилади. Дарахтларни 3 йил парваришлаш, касалликдан сақлаш, суғориш харажатлари ҳам инвестиция дастурига киритилади. 2024 йилда жами 200 млн, шундан баҳор мавсумида 125 миллион туп кўчат экилиши белгиланган бўлиб, баҳор мавсумида 138,1 миллион туп (110,5 фоиз) дарахт кўчатлари экилган.
Фуқаролар фикр-мулоҳазалари, хоҳиш-истакларини атрофлича ўрганиб, билдирилган тавсиялардан келиб чиққан ҳолда, бу борадаги ишларни янги, янада юксак босқичга кўтариш мақсадида Шавкат Мирзиёев 2025 йилни Ўзбекистонда “Атроф-муҳитни асраш ва яшил иқтисодиёт йили” деб эълон қилишни таклиф қилди.
Изоҳ (0)