“Эл-юрт умиди” жамғармаси Президент администрацияси ҳузурига ўтказилади. Бу ҳақда 5 февраль куни Шавкат Мирзиёев раислигида ўтказилаётган йиғилишда маълум қилинди.
Энди жамғарма ҳисобидан ёшларни чет элга ўқишга юборишда малакали ва сифатли инженер ҳамда технологлар тайёрлашга устуворлик берилади. Хорижда ўқитиш бўйича янги тизим жорий этилади.
Шунингдек, Олий таълим, фан ва инновациялар вазирлигига 116 та олийгоҳни ўрганиб, уларни йириклаштириш дастурини ишлаб чиқиш, уларга “миллий”, “давлат” университети, академия ёки институт мақомини беришнинг аниқ мезонларини белгилаш топширилди.
Маълумот учун, мутахассисларни хорижда тайёрлаш ва ватандошлар билан мулоқот қилиш бўйича “Эл-юрт умиди” жамғармаси 2018 йилда ташкил этилган. Жамғарма хорижда яшаётган ва ишлаётган ватандошлар, айниқса, катта илмий салоҳиятга эга бўлган олимлар, мутахассислар ва истеъдодли ёшлар билан ўзаро ҳамкорликни йўлга қўйиш, жаҳон меҳнат бозорида рақобатбардош ва юқори малакали кадрлар тайёрлаш ва малакасини ошириш каби мақсадларда ташкил этилганди.
Изоҳ (0)