Марказий банк 2024 йил якунида Ўзбекистонда инфляция даражаси дастлаб 9 фоиз, кейин 9,5 фоиз бўлишини прогноз қилганди. Бироқ йил сўнгида инфляция 9,8 фоиз шаклланди. Марказий банк раиси Тимур Ишметов журналистлар билан мулоқотда нархлар ўсиши нега кутилмалардан юқори бўлганига изоҳ берди.
Тимур Ишметовнинг айтишича, инфляция кутилганидан кейинроқ пасайишига бир қанча омиллар таъсир кўрсатган.
“Ўтган йилнинг охирида инфляция даражаси кутилмадан бир оз баланд шаклланганига энергия нархлари эркинлаштирилишининг иккиламчи таъсирлари, гўшт, картошка, ўсимлик ёғи таклифи билан боғлиқ омиллар таъсир қилган. Шу омиллар сабаб иккинчи ярим йилликда инфляция даражаси кутилганидан секинроқ пасайган. Коммунал хизматларни ҳисобга олмаганда ҳам, хизматлар гуруҳи инфляцияси умумий инфляция даражасидан юқори шаклланмоқда. Декабрь ойида аҳоли ва тадбиркорларда кутилмалари ўсган, яъни аҳолиники 14,4 фоиз, тадбиркорларники 13,9 фоиз бўлган. Кутилмалар ошишига энергия нархлари, коммунал ва алмашув курслари ўзгаришлари сабаб бўлганини билдришган. Бу келгуси чоракларда базавий инфляцияга тасир этиши мумкин. Шу омилларни ҳисобга олиб, жорий йил якунида умумий инфляция 7-8 фоиз атрофида шаклланиши прогноз қилинмоқда”, деди Марказий банк раиси.
Аввалроқ Тимур Ишметов мазкур прогнозларда 2025 йил давомида энергия, коммунал хизматлар ва ёнилғи тарифлари оширилиши ҳам ҳисобга олинганини айтганди.
“Энергия ва ёнилғи нархлари ўсиши инфляция ошишига 1,8–1,9 фоиз атрофида бирламчи таъсир қилиши кутилмоқда”, деган Марказий банк раҳбари.
2019 йилдаги президент фармонида Марказий банкка инфляцияни 2021 йилда 10 фоизга пасайтириш, 2023 йилда эса 5 фоиз даражадаги доимий инфляцион мақсадни (таргет) ўрнатиш топширилган. Бироқ бу мақсадга ҳалигача етилгани йўқ.
Бугунгача инфляция таргетлари бир неча марта ўзгартирилди. Хусусан, 2020 йилда 5 фоизлик таргет кўрсаткичига эришиш муддати 2023 йилга, 2022 йилдаги мақсад 2024 йил охирига, ўтган йили эса бу муддат 2025 йил иккинчи ярмига кўчирилган.
Сўнгги прогнозларга кўра, 5 фоизлик инфляция даражасига 2026 йилнинг иккинчи ярмида эришиш кутилмоқда.
Изоҳ (1)
хурматли банкирлар 2016-3017 йиллари банк фоизи 12. 14. 16. булган хозир 28 фоиздан кам эмас. уйлаб куринг фойда олиш учун энг купи бн 20. 25 фоиз фойда килади барча бизнесда солиштиринг хозиргига тижорат банкларни чунтагини купайтириб халкни карз ва запретна куйиб кашшок карам киляпти. куриб чикинглар