Joriy yilning aprel oyida gaz, elektr energiyasi, issiq suv va avtomobillar yonilg‘isi narxlari oshirilishi kutilmoqda. Buning taʼsirida inflyatsiya necha foiz o‘sishi mumkin? Bu savolga 23-yanvar kuni Toshkent shahrida o‘tkazilgan jurnalistlar bilan muloqotda Markaziy bank raisi Timur Ishmetov javob berdi, deya xabar qilmoqda “Daryo” muxbiri.
Timur Ishmetovning aytishicha, 2025-yil yakunida O‘zbekistondagi umumiy inflyatsiya darajasi 7–8 foiz atrofida shakllanishi kutilmoqda. Davlat tomonidan boshqariladigan narxlar oshirilishi ham mazkur prognozda inobatga olingan.
“Energiya, kommunal, benzin, propan, yaʼni davlat tomonidan boshqariladigan narxlar oshirilishi oldindan belgilangan. Tariflarning oshirilishi albatta prognozlarda inobatga olingan. Yaʼni energiya va yonilg‘i narxlari o‘sishi inflyatsiya oshishiga 1,8–1,9 foiz atrofida birlamchi taʼsir qilishi kutilmoqda”, dedi Markaziy bank rahbari.
Shu bilan birga, muloqotda 2024-yil avgustda asosiy stavka 14 foizdan 13,5 foizga pasaytirilganining bozorga taʼsiri haqida ham qisqa javob berildi.
Asosiy stavkaning 0,5 foiz pasayishining bozorga taʼsirlari albatta bo‘ldi. O‘tgan yili qatʼiy monetar sharoitlar taʼsirida milliy valyutadagi depozitlar hajmi 1,5 barobar oshgan. Jumladan, aholining jami so‘mdagi depozitlari 79 trillion so‘mdan 113 trillion so‘mga ko‘paygan. Bu yillik 43 foiz o‘sish degani. Foiz stavkasi pasayishidagi o‘zgarishlar davlat qimmatli qog‘ozlari bozorida yaqqon ko‘rindi. Bu qisqa muddatli banklararo pul bozoridagi foiz stavkalarida daromadlilik egari chizig‘ida pasayish bo‘lishiga yordam berdi, dedi Markaziy bank raisi o‘rinbosari Behzod Hamrayev.
Maʼlumot uchun, 2025-yil 1-apreldan aholi uchun gaz, elektr energiyasi narxlari oshirilishi belgilangan. Shu bilan birga, yil davomida issiq suv va issiqlik taʼminoti narxlari 30 foiz o‘sishi aytilgan. O‘tgan 2024-yilda mamlakatda gaz 129 foiz, elektr energiyasi 67 foiz, issiq suv taʼminoti 32,1 foiz, isitish tizimi 36 foiz qimmatlashgan.
Izoh (0)