“Moana 2” animatsion filmi premyerasidan so‘ng sakkiz hafta ichida dunyo bo‘ylab bir milliard dollardan ortiq tushumlarga ega bo‘ldi. Variety nashri ma’lumotlariga ko‘ra, “Moana 2” 2024-yilda mazkur ko‘rsatkichga yetgan Disney multfilmlarining uchinchisidir.
Animatsion film AQSHda 445 million dollar, boshqa xorijiy davlatlarda esa 567 mln dollar ishlab topdi. “Moana 2” filmiga chiptalar sotuvi dastlabki bashorat qilingan ko‘rsatkichdan (135—145 million dollar) oshib ketdi. Shuningdek, animatsion film premyera kunida 57 million dollar ishlab, tarixdagi eng yaxshi prokat natijalaridan birini ko‘rsatdi.
“Moana 2” ekranlarga chiqqandan besh kun o‘tgach, kino prokatida 225 mln dollar yig‘di. Shu tariqa loyiha avvalgi rekord — “Muzyurak 3” (125 million dollar) ni yangiladi.
Bunday muvaffaqiyat “Moana 2”ni Disneyning boshqa mashhur loyihalari (“Boshqotirma”, “Dedpul va Rosomaxa”) qatoridan joy olishiga sabab bo‘ldi. 2024-yilda chiqqan boshqa raqobatchi kompaniya — Illumination Entertainment tomonidan suratga olingan “Yaxshi bo‘lish osonmi” filmi milliard dollarlik ko‘rsatkichga yeta olmadi. Uning kassa daromadlari 969 million dollarni tashkil etgan edi.
Tanqidchilarning bir-biriga zid turli baholariga qaramay, “Moana 2” tomoshabinlar tomonidan iliq kutib olindi. Loyiha ketma-ket yetti hafta ichida AQSH kino prokatining eng yaxshi beshtaligidan o‘rin oldi.
Avvalroq Animator Bak Vudoll Disneyni plagiatda ayblab, kompaniyani sudga bergan edi. Bunga “Moana” va “Moana 2” filmlarida Vudollga tegishli elementlar “Baki” multfilmida ham borligi sabab bo‘lgan edi.
Izoh (0)